Lafaek News—Presidente Republika (PR) Francisco Guterres Lú-olo realiza despidida ho atleta Timor oan na’in 3 ne’ebé máka sei partisipa jogu olimpiku iha tokiu Japaun iha loron 23 jullu to’o 8 agostu 2021.
“Ha’u sauda maluk sira mai serimónia despedida ba ita-nia atleta sira ne’ebé sei partisipa iha Jogus Olímpikus ne’ebé sei realiza iha 23 Jullu to’o 8 Agostu, iha Tókiu, Japão,” dehan PR Fransisco Guterres Lu_Olo, liu husi nia diskursu iha Palasio presidensial Bairo pite, sexta (9/07/2021).
Xefe estadu ne’e hatutan, atleta ida ne’e la’os fasil, maibé bele hatudu ba mundu katak nasaun Timor Leste mós bele kompete iha nivel internasional.
“Kna’ar ida ne’e la’os fasil ba ita-boot sira, PR enkoraja ita-boot sira atu haktuir ita-nia bei’ala sira. Katak sei kompete ho aten-barani no neon-metin. Ho forsa vontade mákas, determinasaun no persisténsia,” tenik PR.
Iha fatin hanesan, Sekretariu estado Juventude no Desportu Abraõ Saldanha, informa, orsamentu ba atleta nain tolu ne’ebé atu ba partisipa jogu Olimpiku iha Tokiu Japão hamutuk rihun haat-nulu.
“Ita konvive iha rai hotu-hotu iha jogu olimpiku kordensaun mundial, no orsamentu apoiu ba partisipasaun ne’e hamutuk rihun $40, despesa boot liu iha viajem, tanba agora dadaun ne’e la iha vou komersiais ne’e halo kustu viajem sai karun,” hatete Abraõ Saldanha.
Alende ne’e mós representa atleta Jogu Olimpiku, Imelda Felicyta Ximenes, deklara, taktika ne’ebé atleta ne’e perepara máka tuir kondisaun Timor Leste nian, maske iha Difikuldade barak.
“Ami nafatin ho espiritu boot hodi bele prepara di’ak liu tan hodi partisipa iha jogus ida ne’e. Ami garante no sei esforsu nafatin, tanba jogu ida ne’e nivel alto, ami ba partisipa no ami esforsu di’ak liu tan hodi hetan pontu ne’ebé mak di’ak,” dehan nia.
Enkuantu, nasaun ne’ebé atu kompete iha jogu Olimpiku hamutuk 206, mak sei kompete iha modalidade 46, iha ne’ebé Timor Leste sei partisipa ho atleta na’in-rua iha modalidade natasaun no nain-ida iha atletizmu.
Ho nune’e, atleta Imelda Felicyta Ximenes husi munisípiu Baucau, José João Viegas da Silva, husi Munisípiu Ermera, Felisberto de Deus husi munisípiu Ermera, sei kompete iha modalidade atletizmu.
Jornalista : Rita Moniz
Asisten Editór : Pedro de Almeida
