Lafaek News—Ministériu Saúde (MS) liu husi komunikadu inprensa informa, pasiente Covid-19 nain ida mate idade hitu-nulu husi Munisípiu Vikeke, no kazu detetadu foun ohin 56.
Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, CIGC-SS), Rui Maria de Araújo, esplika, total óbitu ne’ebé relata ohin, 1 de Jullu 2021: 1 (ida), feto, idade 70, Timoroan, hela iha Viqueque Vila, diagnostikadu sindroma insufisiénsia respiratória aguda (SIRA), tan bá Covid-19 (Cycle Thresehold N2gene 29,9, E gene 27,4) iha Munisipiu Viqueque.
“Iha 26 Juñu, transfere ho aéro-ambulansia ba Vera Cruz, matebian hetan tratamentu ba SIRA, tuir protokolu ne’ebé iha, maibé iha dia 30 de Júnu, 19H25, matebian i’is-kotu. Familia kordena ona ho ekipa saúde atu hala’o funeral tuir protokolu ne’ebé adopta iha Timor-Leste,” Esplika Kordenador Rui Maria de Araújo, liu husi komunikadu Imprensa, Kinta, (01/07/2021).
Alende ne’e mós porta vos relata, ohin dadus jeral Covid-19 iha Timor-Leste tomak ba loron 1 fulan Jullu 2021 nian hamutuk nain 56.
“Kazu detetatu foun ne’ebé relata ohin dia 1 de Jullu de 2021: 56 (iha Dili 36, Munisípiu seluk hamutuk 20), mane 30, feto 26 hirak ne’e idade tinan 60:0 , husi kazu ne’e 21,4 % maka sintomátiku (hatudu sintomas),” tenik nia.
Rui hatete, kazu rekuperadu ne’ebé ralata ohin, dia 1 de Jullu 2021: 65, total kazu ativu ohin, dia 30 de Juñu 2021 : 829, no mós kazu konfirmadu kumulativu iha 1 de Jullu 2021 (sura husi 21 Marsu 2020) hamutuk hotu 9278.
Enkuantu koordenador dehan, iha izolamentu Vera Cruz halo tratamentu ba kazu detetadu nain 10. Iha área obstetrisia nain 4, iha medisina interna nain 10. Sira nain 4 iha obstetrisia, kategoria leve (mild) hotu. Husi nain 10 iha medisina interna, 2 grave/krítiku (1 uza ventilador, nain 1 uza oksijéniu), nain 1 moderadu, nain 7 leve (mild).
Jornalista : Sandi Belo
Asisten Editór : Pedro de Almeida
