Lafaek News—Fundasaun Sentru Quesadhip Ruak, lansa programa “Konta ba Bebe” liu husi Banko Mandiri apoiu bebe ne’ebé hahú moris to’o tinan neen, no ohin nain rua nulu resin ida hetan ona tulun ho osan montante dollar sia-nulu.
“Hanesan ha’u dehan, konta ba bebe iha programa ne’ebé ita halo ona iha 2014 ita nia kriteriu mak ema kiak liu-liu ba familia sira ne’ebé mak foun no la iha rendimentu ne’ebé di’ak,” dehan Fundasaun Sentru Quesadhip Ruak, Isabel da Costa Ferreira ba jornalista sira iha Sentru Quesadhip Taibesi hafoin lansa programa Konta ba Bebe, kinta, (1/07/2021).
Nia hatutan, programa ida ne’e hahú hala’o husi Dili, hetan tulun husi ema ne’ebé mak hakarak atu ajuda ba familia ne’ebé presiza tulun.
“Programa ida dadaun nee ita halo hanesan prezente iha ami nia kazamentu ba tinan 20 ne’ebé ami familia hakarak deside atu ajuda sira ne’ebé afetadu ba inundasaun iha 04/04/2021 duke ita gasta ba halo festa di’ak liu ajuda tanba sira presija ita nia tulun, tan ne’e ohin apoiu ona osan dollar $90,” tenik Isabel.
Isabel dehan, osan ne’ebé tulun ba bebe sira kada fulan hatama dollar sanulu resin lima iha Banku Mandiri hodi ida ne’e apoiu fali familia sira ne’ebé laiha rendimentu no ohin bebe hamutuk nain 21 ida máka sai benefisiariu ba programa refere.
Iha fatin hanesan Manager BANK Mandiri, Danil Morad hatutan, inan aman sira iha osan bele hatama iha bank mandiri atu nune’e bele hadia ba oan nia futuru.
“Ha’u husu ba inan aman sira karik iha osan bele ba hatama iha Bank mandiri tamba ida nee di’ak ba ita nia oan nia futuru,” hakotu Danil Morad.
Jornalista : Sonia de Almeida
Asisten Editór : Pedro de Almeida
