Lafaek News—Ministériu Edukasaun Juventude no Desportu (MEJD), Armindo Maia, tersa (22/06/2021), ofisialmente simu material Ijéniku no konstrusaun ne’ebé entrega simbolikamente husi parseiru Plan-Internasionál hodi apoiu ba eskola munisípiu Aileu ho Ainaru.
Ministru Eduksaun Juventude no Desportu (MEJD), Armindo Maia, hatete, ohin serimonia entrega simbolika ajuda material Ijene no konstrusaun nian husi PLAN Internasional mai iha MEJD atu distrubui fila fali ba eskola sira iha Munisípiu Aileu no Ainaro.
“Materia ne’ebé iha konsiste husi sabaun lifeboy, iha mós material hand-sanitaizer, bailkin, viksal, nune’e mós material apoiu ba konstrusaun ruma husi inundasaun ne’ebé mak akontese liu ba,” Informa Armindo Maia ba Jornalista sira iha Salaun MEJD vila Tersa semana ne’e.
Armindo dehan, Plan-Internasionál entrega simbolikamente ida ne’e hanesan manifestasaun espresaun husi servisu hamutuk entre MEJD ho Organisazoens Non Governamentais sira durante ne’e hodi prevene komunidade ekukativa, alunus profesores, inan-aman sira, liu-liu iha ambiente eskola nian.
Iha fatin hanesan Diretora PLAN Internasioal Dili, Dillyana Ximenes, salienta Plan Internasional simu pedidu husi MEJD presiza atu suporta material Ijéniku ho konstrusaun.
“Nu’udar parseiru ami iha kometimentu uza fundus rasik ho montante rihun $8.300, hodi sosa material Ijéniku sira hanesan sabaun lifeboy, Viksal baiklin, inklui material konstrusaun nian hanesan prego hodi suporta ba eskola Ensinu sekunaria (98) iha Ainaro no (97) iha Aileu,” dehan Diretora PLAN Internasional, Dillyana Ximenes, hafoin enterga material.
Nia esplika, ne’e hanesan simbolika de’it maibe material sira ne’e iha ona armajen edukasaun Munisípiu Aileu, no Ainaro depois de ida ne’e aban ekipa sira sei lori ba entrega iha Edukasaun munisípiu Ainaro nian.
Entretantu husi serimornia entrega material, Ijéniku ho material kontrusaun ne’e partisipa husi Diretora Plan Internasional ho nia ekipa, no mos Ministru Edukasaun Juventude no Desportu Armindo Maia ho nia vise Antonio Guterres, inklui mós diretores hotu MEJD nian.
Jornalista : João da Costa Soares.
Asisten Editór : Pedro de Almeida
