Lafaek News—Komunidade reklamante atus rua resin hosi Suku Vila-Verde Postu Administrativu Vera-Kruz minisípiu Dìli to’o ohin loron seidauk simu sesta bázika, tanba tarde iha ficha família.
Xefe suku Vila-Verde Abdul M. Aranhado, esplika, programa sesta bázika ne’ebé oitavu governu fornese ba komunidade, iha suku vila-verde simu ona maibé hela uma kain 222 maka seidauk hetan no sira ne’e mak reklama.
“Reklamante sira ne’e antes la rejistu depois ema sira simu hotu ona, mak foin sira mai fali husu lista ne’ebé mak iha maibé, ami hatama tiha ona, enatun ami foti fila sira nia naran no haruka fali ba, maibé to’o agora seidauk iha rejultadu,” dehan Xefe suku Vila-Verde Abdul M. Aranhado, ba Lafaek news, sesta, (11/06/2021).
Abdul hatutan, komunidade hirak ne’ebé simu ona sesta bázika to’o agora laiha ona tanba hahan hirak ne’e la sufisiente, governu mós kontinua extende estadu emerjénsia no konfinamentu obrigatóriu, difikulta ema hotu atu hetan osan hodi responde ba nesesidade loro-loron nian.
Entretantu populasaun iha Suku Vila-Verde hamutuk rihun sanulu resin Lima atus tolu ha’atnulu resin haat (15.344) husi numeiru ne’e nain 222 mak reklamante.
Jornalista : João da Costa Soares
Editor : Agapito de Deus
