Lafaek News— Kinta (10/06/2021, Ministeriu Edukasaun Juventude no Desportu (MEJD) konvoka reuniaun ho Embaixada Nova-Zelándia hodi ko’alia kona-ba programa edukasaunpre-eskolár (HAND) iha etapa daruak ne’ebé hetan apoiu hosi estadu Nova-Zelándia ho orsamentu dollar rihun 10.
“Ohin kontinuasaun diskusaun kona-ba programa Hands ida ne’ebé koperasaun entre MEJD ho governu Nova Zelándia atu apoiu liuliu kona ba edukasaun pre-eskolar,” dehan Armindo Maia ba lafaek news iha restaurante Pro-Ema, Bidau Lecidere, kinta semana ne’e.
Nia hatutan, program edukasaun pre-eskolar ne’e importante, maske ema ladun fó atensaun, maibé edukasaun pre-eskolar ne’e forte maka sei garante kualidade estudante no sei adapta lalais bainhira hakat ba ensinu báziku.
“Apoiu ne’e sei investe ba iha edukasaun pre-eskolar liuliu ba infraestrutura, formasaun ba profesore sira, materiál Dedátiku no seluk tan, apoiu ne’e ho total orsamentu hamutuk dollar rehun 10,” hakotu Ministru
Iha sorin seluk, Koordenadór Programa Dezenvolvimetu Embaixada Nova-Zelándia, Agusto Ferreira Soares reforsa, ekontru ho ministru edukasaun ho nia vise haree liu ba programa Nova-Zelándia nian ne’ebé apoiu edukasaun pre-eskolar ho naran koñesidu HANDS, halimar aprende no deskobre susesu.
“HANDS iha faze primeiru la’o hosi 2016 mai to’o iha 2020, iha faze dezeñu ne’ebé mak kompletu tiha ona. No ohin halo konsultasaun ho Ministru no vise Ministru no diretór jerál, inklui ekipa tekniku Ministeriu nian, ita haree no konkorda ho dokumentu no esbosu sira ne’ebé mak aprezenta hanesan deszeñu ba programa faze segundu nian husi 2021 ba to’o 2025,” dehan Senior koordenadór programa dezenvolvimetu Embaixada Nova Zelándia, Agusto Ferreira Soares ba jornalista lafaek news iha hafoin enkontru ho MEJD remata.
Nia salienta sira mós konkorda ba akordu parseiru ne’ebé sei asina entre Ministériu Negósiu Estranjeiru Nova Zelándia ho Ministeriu Edukadaun Juventude no Desportu Timor-Leste, ho intensaun iha prosesu ba implementasaun sei iha diploma ministeriál konjunta entre ministériu rua MEJD ho MAE atu hala’o atividade ensinu pre-eskolar nian ba to’o iha nivel munisípiu.
“Tuir planu akordu ne’e sei asina depois de semana rua tanba ekipa hosi Ministeriu Edukasaun, ekipa hosi Embaixada Nova-Zelándia no ekipa hosi Hands sei hadia no finaliza dokumentu sira tuir rekomendasaun ohin no antes fulan ne’e remata sei asina hodi legaliza kooperasun ba tinan lima mai tan,” esplika nia
Nova-Zelándia Apoiu program pre-eskolar total orsamentu hamutuk millaun 10 atu kobre formasaun dos profesores, fatin halimar ba labarik sira, apoiu ba munisípiu kona-ba jestaun pre-eskolar no haree ba kualidade edukasaun durante tinan lima nia laran.
No Iha faze dahuluk ba programa pre-eskolar NZ apoiu ho total orsamentu milaun 11 ne’ebé totál orsamentu ba apoiu faze rua ne’e hamtuk besik rihun 20 liu,” mensiona nia
Investimetu tinan lima dahuluk hatudu taxa matríkula edukasaun pre-eskolar ne’e aumenta, kompara antes implementa projetu ne’e iha taxa matrikula pursentu 11, maibé depois de implementa sai ba besik pursentu 30.
Jornalista : Felisberto Fernandes
Editór : Agapito de Deus
