Lafaek News—Sekretáriu Estadu Juventude Desportu (SEJD), ho Grupu Traballu Tékniku Revizaun Juridiku (GTTRJ) hahú reuniaun konvokatóriu ba dahuluk aprezenta metodolojia aselera lei arte marsial iha Timor-Leste.
Asuntu ne’e hato’o husi Sekretáriu Estadu Juventude Desportu (SEJD) Abrão Saldanha, ba Jornalista sira hafoin prezide reuniaun konvokatóriu foun ba dahuluk husi Grupu Traballu Tékniku Revizaun Juridiku (GTTRJ) kona-ba exersisiu Arte Marsiais Iha Salaun Auditóriu Ministeriu Finansas, 10/06/2021.
“Ohin diskusaun ne’e iha aprezentasaun ba metodolojia oinsá halo konsultasaun no rona de’it iha governu nia prespetiva, maibé rona arte marsiais sira komponente hotu sosiedade nian, relijiozus sira nia opiniaun liu-liu arte marsiais sira, oinsá bele aselera lei ida ba sira,” esplika Abrão Saldanha,
SEJD ne’e hatutan, Tarjetu mak husi konsulta sira ne’e, mak apresenta husi nesesidade no vizaun, no hein katak husi konsulta munisípiu sira halo ona, ba da-daun ba pratikante sira halo hela levantamentu liu husi online, levantamentu online ida, ne’ebé la’o hela hein katak agora iha hela diskusaun ho entidade sira Relijiozu sira no komponente sosiedade nia mós konsultasaun la’o hela.
Enkauntu antes ne’e iha 20 Febereiru 2020 governu deside ona kona-ba revogasaun Rezolusaun Governu nian Nu. 16/2013 Loron 10 fulan Jullu kona-ba Estinsaun (bandu) ba grupu Artes Marsiais, nune’e bele aplika fali lei Nu.5/2017 loron 19 fulan Abril, kona-ba Rejime Jurídiku Relativu ba Prátika Arte Marsiais, Rituais, Armas Brankas, Rama Ambon no Alterasaun Dalimak nian ba Kódigu Penal, tanba rezolusaun Governu nian la boot liu lei.
Iha fatin hanesan, Kompaña Juridico Sosiál, Rosa Xavier, hateten, kona-ba artemasiais iha Timor-Leste, afirma, ohin kona-ba elaborasaun kona-ba lei arte marsial nian sei iha hela konsultasaun públiku
“Ohin ami halo hela aprezentasaun katak, prosesu ne’e sei iha hela nivél konsulta públiku, tanba elaborasaun ba lei ida-ne’e presiza iha konsulta ida kle’an, atu Husu hanoin husi entidades sira ne’ebé mak kontribui ba iha prosesu ida-ne’e,”dehan nia.
Jornalista : Rita Moniz
Asitén Editór : Egidio da C. T. Nono
