Lafaek News—Ministra Saúde (MS), Odete Maria Freitas Belo, afirma, ema ne’ebé infetadu ba Covid-19 seidauk bele simu vasina, maibé tuir siénsia katak liu tia fulan neen máka foin bele vasina.
“Sira ne’ebé daudaun ne’e pozitivu seidauk bele hetan vasina, liu tiha fulan neen mak foin bele simu vasina, tanba bainhira hetan ona vasina ita nia isin koñese ona virus ne’ebé iha ita nia isin, entaun ita nia isin dezenvolve hela imunidade no bainhira prosesu ne’e, ita prefere lalika fó lai vasina, husik nia dezenvolve kompletu ona máka fó vasina ho períodu hanesan, ida ne’e siénsia mak hateten hanesan ne’e,” hateten Ministra Saúde ba jornalista sira, hafoin enkontru ho PM Taur Matan Ruak, iha nia rezidénsia Farol, tersa, (27/04/2021).
Nia haktuir, ema ne’ebé simu ona vasina , sei iha posibilidade atu hetan moras Covid-19, maibé virus ne’e rasik la forsa ona atu bele hada’et tutan ba ema seluk.
“Bainhira ema prodús vasina, matenek nain sira dehan katak vasina ne’e ita simu doze kompletu maibé posibilidade atu da’et virus ne’e iha nafatin, tanba laiha vasina ida ninia efikásia to’o 100 %, entaun sempre iha posibilidade atu hada’et maske ita simu ona vasina,” nia fundamenta.
Ministra esplika, bainhira simu ona vasina ninia vantajen máka virus la forsa ona atu da’et tutan ba ema seluk, atu kona mós sei la moras todan, signifika la presiza ba toba iha ospitál uza oxijéniu ho ventilador.
Enkuantu governante relata, Timor-Leste iha 24 mill dozes, to’o ohin loron ema rihun rua nulu resin neen (26) máka simu ona vasina AstraZeneca.
Jornalista : Sandi Belo
Asisten Editór : Pedro de Almeida
