Lafaek News (FATUMEAN)–Lider Másimu Arte Rituál Hitu-Hitu (77), Raimundo do Carmo “BIRU SADAN” no Santiago Tilman reafirma pozisaun suporta nafatin lider instóriku, Kay Rala Xanana Gusmão no apoia Premiadu Nobel da Paz, Jose Ramos Horta hodi kandidata aan ba Prezidente Repúblika periodu 2022-2027.
Deklarasaun alerta ne’e, lider Hitu-Hitu na’in rua hato’o hodi fanun membru tomak Arte Rituál 77 atu hamariik defende lider istóriku Timor-Leste sira ne’ebé iha prinísipiu luta no defende soberania nasaun Timor-Leste iha prosesu dezenvolvimentu no hasai povu hosi kiak no mukit tuir prinsípiu ukun rasik aan.
Nu’udar na’in Arte Rituál “Sete -Sete” (77), ha’u apela ba membru Arte Rituál 77 atu hamriik firme nafatin hamutuk ho ha’u, mai ita hamutuk fó apoiu ba Lider Istoriku, Maun Boot Kay Rala Xanana Gusmão no Maun José Ramos Horta hodi sai kandidata aan ba presidente repúblika periodu 2022-2027 no maun Xanana ba Primeiru Ministru hodi sira rua hamutuk ho Lider Timoroan sira seluk hadia nasaun hakat prosesu dezenvolvimentu no hasai povu hosi kiak no mukit,” deklara Lider Masimu Arte Rituál “Sete- Sete” (77), Raimundo do Carmo “BIRU SADAN” akompaña hosi Santiago Tilman iha rezidensia, Fatumean, Postu Administrativu, Fatuemena, Munisipi Covaliman, kuarta (09/02).
Raimundo dehan, bainhira iha membru ka ema intelektuál ruma mak lori organizasaun nia naran, hodi apoiu kandidatura prezidente republika seluk, sira sei la konsidera no la reprezenta Arte Rituál 77 nia naran.
Se ema ruma lori Arte Rituál 77 nia naran apoia fali kandidatu seluk, ami konsidera ne’e la reprezenta 77 nia naran,” nia alerta.
Iha fati hanesan Santiago Tilman nu’udar oan mane boot hosi Saudozu Fundador Arte Rituál 77“MAUK MORUK” deklara, Arte Rituál 77 moris ho nia prinsipiu rasik no firme nafatin apoia Xanana no Ramos Horta.
Ita apoiu ba lider sira ne’ebé iha prinisipiu hakarak hadia povu moris no hadia dezenvolvimentu ba nasaun,” tenik nia.
Arte Rituál “Hitu-Hitu” (77) harii ka Funda hosi Saudozu, João “LUAN MORUK” ho nia belun di’ak Saudozu “MAUK MORUK” iha loron 7 fulan Agostu 1942 ne’ebé moris no sai hosi Uma Lulik, “BUTAK BUNAN BEI-LUARESAK” iha Fatumean-Kovalima.
Depois, Arte Rituál 77 ne’e hahú eziste no sai boot ba Timor laran tomak komesa ona iha loron 7 de Maiu 1974. Iha altura ne’eba, Arte Rituál 77 refere hala’o ninia misaun sagradu buka halibur juventude rezistensia no hamutuk ho Asuwain FALINTIL sira suporta idolozia Partidu Istoriku ASDT lideradu Saudozu Proklamador Independensia 1975, Fransisco Xavier do Amaral hahú mehi luta ba ukun aan, depois de ASDT halo tranformasaun ba Partidu FRETILIN 1974 ne’ebé lideradu Saudozu Nicolau dos Reis Lobato hodi hamutuk ho Arte Rituál 77 iha 1975 baze de apoiu nakdera.
Iha funu invazaun Indonézia 7 Dezembru 1975, Saudozu LUAN MORUK hamutuk ho Timoroan sira hetan kapturasaun no kastigu durante periodu funu. Iha prosesu luta nia laran, Saudozu João “LUAN MORUK” hamutuk nafatin ho Lider Kontinuador Komandante En Xefe das FALINTIL, Kay Rala Xanana Gusmão ho organizasaun CNRM-CNRT too hakotu funu 1999.
Nune’e, iha tinan 2000 too mai agora, Arte Rituál ne’e kontinua hamrike firme no eziste nafatin defende ninia prinisipiu hamutuk metin nafatin ho Lider Istoriku Maun Boot, Kay Xanana Gusmão, iha periodu Timor-Leste independensia, Saudozu João “LUAN MORUK” termina perigrasaun iha 2016. Nune’e, Arte Rituál 77 kontinua ezjiste hodi entrega hikas konfiansa ba Saudozu nia oan mate boot, Raimundo do Carmo “BIRU SADAN” nu’udar na’in ba Arte Rituáll 77 hodi eziste too agora.
Prinisipialmente no fundamentu Arte Rituál 77 harii objevitu organiza juventude da rezisténsia sira hodi defende lia-loos luta ba independénsia Timor-Leste ka’er metin ka uza kakaluk hodi luta defende ukun aan, iha tempu okupasaun Indonézia, Arte Rituál 77 kontinua eziste hosi vila too ai-laran, no hosi ai-laran ba too vila kontinua apoia no hala’o servisu klandestina ne’ebé orienta hosi Komando da Luta, Kay Rala Xanana Gusmão.
Entretantu, iha loron (28/07/2020), Kay Rala Xanana Gusmão hala’o vizita privadu ba uma lisan rua hanesan, Belulik Kraik-no Belulik Leten, Fatumean -Covalima no hasoru malu Lider Masimu 77,Raimundo do Carmo “BIRU SADAN” hodi hatudu respeia ba uma lisan no foti bua no malus.
Jornalista : Abekha Rai-Husar
Editor : Agapito de Deus
