Lafaek News (Ainaro)–Xefe Kaza Sivil Prezidénsia Repúblika, Francisco Maria de Vasconcelos, husu governu presiza tetu maneira aproximasaun no apoiu ne’ebé fó ba grupu produtivu ne’ebé apoiu husi governu hodi sustenta sira-nia atividade.
Xefe Kaza Sivil hatoo kestaun ne’e bainhira halo vista ba fatin haki’ak modo husi grupu produtivu, Movimentu Agrikultura Progresivu Ainaro iha munisipiu Ainaru no akompañia husi Ministru Edukasaun, vise Ministru Agrikultura, vise Ministra Solidariedade Sosiál, Sekretáriu Estadu Formasaun no Empregu, Prezidente Komisaun F Parlamentu Nasionál no Prezidente Komisaun G.
“Ita presiza tetu fila fali polítika Sinterklaa ema husu ka hatama proposta ita fó apoiu, proposta ita hatán mas oinsá se programa di’ak bele opta sai hanesan programa ministériu nian., Ha’u hakarak dudu ba governu, ba Ministériu sira, para oinsá movimentu husi grupu sira hanesan agrobisnis (agronegósiu) ho tan sira seluk, ita komesa identifika atu sai hanesan programa iha munisípiu. bainhira nia sai programa munisípiu, nia hanesan anexu ida programa munisipiu ne’e tomak,” Dehan Xefi kaza Sivil Francisco Maria de Vasconsellos iha Ainaro tersa 17/07/2021.
Tuir Kaza Sivil, grupu ne’e harii husi lisensiadu no estudante area agrikultura ne’ebé halibur mós joven sira ne’ebé la kontinua eskola hodi kuda modo oioin ba agronegósiu hanesan: mostarda, modo-mutin, repollu, alfase, tomate no seluk tan.
Iha fatin hanesan, Koordenadór Movimentu Agrikultura Progresivu (MAP), Inácio da Cruz, esplika sira hahu Zero , estabelese grupu ne’e ho fundus inisiu $ 100, deve husi Presidente CNJTL ainaro too agora seidauk selu.
“Ami hahú husi zero. Ami estabelese grupu ne’e ho fundus inísiu $ 100 ne’ebé ami deve husi ami-ninia Prezidente Konsellu Joventude CNJTL Ainaro no to’o agora seidauk selu”.
Nia hateten sira uza de’it enxada maka ta’a rai no rega modo hirak ne’e ho liman de’it. Tanba sira-nia ema la to’o sira husik tiha “kanteiru” 25. “Tanba uza gembor ne’e (Bee fatin hodi rega modo), ami putar ba mai bele tama to’o tiha Aileu.
Inâcio da Cruz hatete sira mós hato’o ona ba Ministériu Agrikultura no Peskas, maibé seidauk hetan resposta, atu apoiu Tratór-liman Tiller, tratór ki’ikoan hodi harahun, kahur rai no halo bedengan (kanteiru), molok kuda modo.
ligadu ho notisia lafaek news seidauk halo konfirmasaun hp MInisteriu Agrikultura Peskas (MAP), maibe redasaun sei tenta atu halo konfirmasaun atu fo resposta ba preukupasaun kooperativa hortikultura husi munisipiu Ainaru ne’e.
Jornalista : Rita Moniz
Editor : Agapito de Deus
