Lafaek News– Xefe Suku Komoro organiza komunidade sira hamoos lixu hirak ne’ebé maka nakonu valeta laran iha area merkadu kampung baru.
Objetivu husi limpeza lixu hirak ne’e atu garante ambiente mo’os no saudável iha suku, aldeia no bairu, liuliu fó imazen furak ba nasaun Timor-Leste.
Objetivu seluk maka atu prevene ita husi moras ruma ne’eé hada’et husi susuk, tamba oras ne’e tempu udan nune’e nakonu tan ho lixu ne’ebé iha valeta bele afeta ita nia komunidade sira., Ita nu’udár autoridade ita tenki bo’ok-an uluk ho siituasaun sira hanesan ne’e, ita maka la book-an, komunidade nafatin laiha konsiensiaa hodi soe nafatin lixu ba iha valeta laran, hodi halo nakonu valeta no be’e sa’e fali ba estrada,” Xefe Suku Komoro, Eligio J. da Silva Marçal ba jornalista sira iha merkadu kampung baru Komoro, sesta 01/03/2024.
Nia afirma, Programa ida ne’e la’os ohin de’it maibé hahú iha nia mandatu bainhira simu tiha tomada de posse hanesan xefe suku ba suku Komoro; sira planu ona katak oráriu ida-ne’e sei implementa kada semana.
“Programa ida ne’e la’os ohin de’it maibé hahú iha ha’u nia mandatu waihira simu tiha tomada de posse hanesan atual xefe suku ba suku Komoro; ami planu ona katak oráriu ida-ne’e semana-semana. No ida ne’e la’os implementa iha aldeia ida deit, maibé husi aldeia ida ba aldeia seluk no sei halo atividade limpeza ida ne’e ba aldeia 14 iha suku Komoro rasik”, haktuir Eligio.
Xefe suku Eligio nota rasik katak lixu hirak ne’ebé maka nakonu iha valeta laran ne’e la’os de’it plástiku, masa/akua mamuk sira no modo sira deit, maibé inklúi mós roupa aat sira ne’ebé maka komunidade sira la uja ona no la soe iha lixu fatin maibé soe de’it iha valeta kuak, hodi taka tiha bee dalan no bee labele liu, automatikamente bee tenki sae mai nakonu iha Estrada, Nia Salienta.
Lider komunitáriu ne’e hatoo mensazen ba komunidade sira, atu iha konsiénsia so’e fo’er tuir nia fatin, katak valeta ne’e ba bee la’os ba foer sira. Nia mós husu ba komunidade sira ne’ebé mak faan sasan iha merkadu refere, atu tau sira nia sasan foer iha foer-fatin ne’ebé preparadu ona.
Iha fatin hanesan komunidade Rosita dos Santos sente orgullu ba xefe Suku ne’ebé fuan bo’ot hadomi nia suku laran, nia aldeia no nia bairu rasik hodi halo limpeza ba fatin hirak ne’ebé komunidade sira halo movimentu maibé laiha konsiénsia.
“Orgullu tebea ho Xefe Suku ne’ebé maka ho fuan bo’ot hadomi nia suku, nia aldeia no nia bairu rasik, hodi halo limpeza ba fatin hirak ne’ebé komunidade sira halo movimentu maibé laiha konsiénsia,” Rosita hakotu lia.
Jornalista : Andre Soares
Editór : Agapito de Deus
