Lafaek News–Primeiru Ministru Jenerál Taur Matan Ruak husu Ministériu Justisa liu husi Polísia Siéntifiku Investigasaun Kriminal (PSIK) kaptura ajénsia ilegal hirak ne’ebé haruka Timor-oan ba servisu iha estranjeiru la tuir lei.
Ajensia ne’ebé rekruta sidadaun sira la tuir dalan , ha’u nia orientassaun ba ministeriu Justisa, PSIK se iha krime organizadu, tenki kapruta hotu, iha tráfiku umanu tenki kaer hotu, Sira halo sira nia sasan, lori ita nia sidadaun sira ba hotu iha fatin fatin, kuandu ladi’ak ona, at ona governu mak responsavel, governu mak sala, kuandu di’ak sira la liga governu, ba ne’ebé ba ne’ebe sira lao de’it, labele ona mate governu mak tenki lori fila, at ona governu mak lori fila ne’e labele”, esplika Primeiru Ministru Jenerál Taur Matan Ruak ba jornalista iha Palásiu Prezidensiál bairo-pite kinta( 07/07/2022).
Xefe governu afirma, sidadaun sira mós tenki hanoin iha disiplina, iha governu ida mak lidera, sidadaun tenke rona no kopera, klaru sira iha esforsu oinsa bele moris, labele hanoin de’it di’ak, hanoin mos at, ajensia ne’ebé laiha autorizasaun atu halo ida ne’e , haruka kaer hotu hanesan ministeriu Interior, Primeiru Ministru, sira tenki para agora, tenki kumpri lei.
Ha’u sai Primeiru Ministru ne’e ha’u halo juramentu kumpri lei no obriga ema seluk kumpri lei, laos ema at mak ita preokupa, ita tenki preokupa husik ema ne’ebé halo sasan at, se ita husik de’it ita mak sala, nune’e ita iha responsabilidade atu buka solusaun hodi evita”, dehan PM Taur.
Iha okaziaun ne’e xefe governu deklara ba jornalista, Sidadaun Timoroan ne’ebe mak atu fila fali mai Timor-Leste ajensia mak selu lori fila, osan iha haruka ba, entaun ajensia tenki haruka sira fila, governu laiha osan atu selu.
Nasaun bele kiak, susar, maibé nasaun iha lideransa ida, governu, estadu buka tuir regras sira, Sira ne’ebe mak atu fila fali mai ne’e ami haruka ajensia sira mak selu lori fila, sira osan iha haruka ba, entaun sira tenki haruka sira fila, ha’u laiha osan atu fo ba sira”, tenik PM Jenerál Taur.
Entretantu iha enkontru semanal ne’e Primeiru Ministru Jenerál ho Prezidente Repúblika José Ramos Horta toka asuntu kona-ba dezastre naturais iha Vikeke, Lospalos, Same Suai ne’ebé afeta ba populasaun besik familia atus sia buka dalan oinsá atu bele fo apoiu, no toka mos asuntu, atividade governu nian no inklui Presidente Repúblika José Ramos Horta iha loron 9 ba halo diálogu iha komunidade Ermera kona-ba kafé, PM komvidadu mós no ha’u promete ba PR Horta atu partisipa iha inisiativa ida ne’e ho Ministru balun ko’alia ho komunidade rona sira nia Prokupasaun.
Jornalista : Rita Moniz
Editór : Agapito de Deus
