Lafaek News--Kuarta 19/10/2022 Prezidente Repúblika Timor Leste, José Ramos-Horta, hasoru malu ho Liurai Reiñu Kambódia, Narodom Sihamoni, hodi desktuti relasaun ekonómika no komersiál entre nasaun rua.
“Reinu Kambodia nu’udár reinu antigu tebes, nia istória luta, terus mos hanesan ita, tanba ne’e, sira simpatia maka’as tebes-tebes. Ohin ko’alia ho Liurai nu’udár ema artisita ida. Ohin, hanesan hakat ida husi diplomasia ho Kambódia ba tinan 20 nia laran” haktuir Xefe Estadu hafoin hasoru malu ho Liurai Kambódia iha Palásiu Real”, deklara Prezidente Repúblika José Ramos-Horta ne’ebé mak Lafaek News asesu iha média Palasíu Presidensiál Kinta (20/10/2022).
Xefe Estadu afirma, Timor-Leste rejista avansu maka’as iha relasaun diplomátika maibé presija aposta iha àrea komérsiu no ekonómiku.
“Ministériu Ekonomia, Komérsiu no Indústria hatene oinsa TL sosa no importa foos husi Kambódia, bele karun oituan maibé kualidade di’ák no garante fornesimentu alternativu tambá dala ruma iha krize bo’ot ruma, Vietname mós la konsege halo explortasaun ba ita, ne’e duni, Timor tenke diversifika rai ne’ebé importa foos nu’udár alimentu importante ba povu”, esplika PR Horta.
Tuir Prezidente Repúblika Ramos-Horta, Buka mos investimentu ho seitór privadu nasionál no internasionál bazeia iha Kambódia, buka sira nia investimentu iha área agrikultura no turízmu iha Timor-Leste. Primeiru-Ministru Hun Sen vizita ona Timor-Leste, ohin ha’u konvida mos Sua Majestade, Liurai Kambódia atu vizita Timor-Leste no Nia simu ho laran konvite ne’e.
Entretantu, Timor-Leste no Kambódia sei assina akordu kona-ba servisu aereo, hodi permite voo mensal husi Phnom Penh mai Díli, hodi fasilita passajeiru husi Xina mai Timor-Leste, tamba paíz ne’e jeográfikamente besik liu Xina.
Enkontru ne’e ko’alia mós kona-ba adezaun ba ASEAN, tamba Kambódia apoia adezaun Timor-Leste nia integrasaun ba organizasaun rejionál ne’e iha tinan 2023, Prezidente Repúblika mós sente kontente ho resepsaun vizita husi Aeroportu Phnom Penh to’o Otél.
Prezidente Repúblika mós konvida Liurai Kambódia, Narodom Sihamoni atu vizita Timor-Leste, tuir ajenda, Xefe Estadu sei hasoru malu mós ho senadu Reiñu Kambódia, entidade militár, seitór privadu no alta entidade seluk.
Jornalista : Rita Moniz
Editór : Agapito de Deus
