Lafaek News–Durante Fulan tolu hahú hosi fulun Fevereiru-Abril Prezidente Konsellu Imprensa (KI), Virgilio da Silva Guterres alias “Lamukan” husu dispensaun ba nia kna’ar tanba tuir konkorensia eleisaun Prezidensiál no ohin reativa fali kargu nu’udar Prezidente Konsellu Imprensa.
Ohin loron 25 fulan Abril hanesan loron importante loron liberdade nian, iha ne’ebé ha’u hahu fali assume ha’u nia kargu hanesan prezidente konellu imprensa,” dehan Prezidente Konsellu Impresa Virgilio da Silva Guterres alias “Lamukan” iha konferensia impresa ne’ebé iha salaun enkonru KI, Quinta Boot, segunda (25/04/2022)
Nia akresenta,tradisaun ne’ebé konsellu imprensa nian, uluk molok atu hahú ba kampaña presija halo konferensia imprensa no atu retoma fali kargu prezidente KI tenke halo nafatin konferensia imprensa hodi hato’o ba públiku katak, atividade polítiku hotu ona.
Virgilio aproveita oportunidade hato’o apreziasaun maka’as ba konselleru KI, Expedito Dias Ximenes ne’ebé durante fulan 3 responsabilidade nu’udar prezidente interinu KI hodi kontinua prezide plenaria no inkontru sira hodi mantein servisu konsellu imprensa nian, tau matan ba kobertura média sira nian no aktividade jornalista sira nian iha ambitu kampañia no eleisaun prezidensiál nian.
Agradese mós ba jornalista sira hotu ne’ebé durante fulan tolu halo kobertura ba kandidatu hotu iha eleisaun prezidensiál no inklui mós ba hirak ne’ebé akompañia ha’u hodi haleu munisípiu,” tenik nian.
Hosi horseik ba kotuk to’o loron 24 fulan Fevereiru, Vigilio konfesa, nia liberdade atu ko’alia kona ba partidu politiku ka defende nia prozisaun politiku ka partidu ne’ebé nia afilia maibé hahu ohin ba oin, nia intervensaun tenke ba konsellu imprensa nia interese ba liberdade imprensa no liberdade espresaun.
Nia aproveita tempu, karik iha fulan tolu liu ba iha kampañia nia laran, iha liafuan ruma ne’ebé nia espresa tanba defend nia politika karik la monu ba públiku balun nia laran ho haraik an nia husu deskulpa.
Iha fatin hanesan, Konselleru Expedito Loro Dias Ximene ne’ebé hatete, nia simu knaar nu’udar Prezidente interinu konsellu imprensa tanba Prezidente aktuál Kosellu impresa Vigilio da Silva Guterres “Lamukan” durante fulan tolu tuir konkorensia eleisaun Prezidensiál.
Despensasaun ne’ebé Konsellu imprensa fó ba Sr. Virgilio da Silva Guterres durante fulan tolu no ohin loron 25 fulan Abril, nia halo fali kna’ar hanesan prezidente konsellu imprensa no hau sei entrega kargu ne’e fila fali ba nia,” deklara nia
Nia hatutan, eleisaun presidensiál primeira volta no segunda volta, aproveita oportunidade ida ne’e hodi agradese ba jornalista sira hosi média hotu-hotu no ba média nain sira hotu ba ita nia servisu hamutuk.
Maske iha apontas balun ne’ebé KI halo durante eleisaun prezidensiál, ami konsellu imprensa iha ekipa monitorizasaun no avaliasaun hodi halo analiza ba iha produtu jornalistiku durante eleisaun prezidensiál primeira volta no segunda volta,” dehan nia
Nia informa, Avalisaun ida ne’e sei hato’o ba jornalista sira maibé enjerál Kosellu imprensa hakarak agradese durante fulan tolu nia laran ba aktividade sira ne’ebé jornalista sira hala’o hatudu duni imparsialidade no neutralidade iha akitividade jornalistiku.
Jornalista : Felisberto Fernandes
Editor : Agapito de Deus
