Lafaek News—United States Agency For International Development (USAID) lansa atividade ba sustentabilidade sistema saúde, hodi haforsa saúde liu husi hadia kapasidade governu Timor Leste no sistema saúde iha nivel nasionál too munisipiu.
“Atividade ne’e, atu haforsa governasaun saúde liu husi hadia kapasidade governu Timor-leste nian atu haforsa Sistema saúde iha nivel Nasionál no munisipiu sira, no fó suporta tekniku ba ministériu saúde nia jestaun estratejiku,” esplika embaxador Estadus Unidus Amerika, Kevin Blackstone, ba jornalista sira iha Novu Turizmu, Bidau Lecidere, Sesta (2/07/2021).
Nia hatutan, sistema saúde ne’ebé forte importante tebes, hodi Nasaun bele prepara no apár ho pandemia no hasoru dezafius seluk ne’ebé parte saúde sira hasoru.
“Ami orgullu hodi servisu hamutuk ho governu no povu Timor-leste hodi dezenu Sistema ne’ebé rigorozu bele ajuda garante saúde ne’ebé di’ak ba futuru jerasaun Timor-leste nian,” tenik nia.
Iha fatin hanesan Ministra saúde Odete Maria Freitas Belo dehan, iha buat barak mak sira halo, maibé iha balun presija atu hadia di’ak liután.
“Entaun ho apoiu husi Nasaun no ajénsia internasionál sira ne’ebé lori nasaun nia naran ami prontu nafatin atu bele hare’e iha parte ida ne’ebé mak sira la forsa no iha parte ida ne’ebé mak sira tenki lori nafatin ba oin, tanba programa ida ne’e iha relasaun ho saúde, ko’alia kona-ba atu haforsa Sistema saúde ne’ebé mak sustentavel,” nia informa.
Nia hatutan, sistema saúde hare’e mós ba pilares sira ne’ebé kontribui ba ema nia saúde no moris di’ak, define politika saúde, regula setor saúde, asegura seguransa no kontrolu kualidade saúde, kria instrumentu jestaun ba prestasaun servisu saúde, asegura prestasaun saúde primaria, sekundaria no tersiaria, liu-liu ba protesaun saúde publika promósaun no edukasaun hodi prevene moras no moris saudavel no kura ema husi moras.
“Ita ko’alia kona-ba Sistema nasionál saúde ne’e Ministériu saúde nia knaar inportante tebes, no ita la bele asegura sustentabilidade Sistema saúde se ita la haforsa kapasidade governasaun no lideransa ministeriu saúde hanesan orgaun estadu ne’ebé responsavel ba dezenvolvimentu setor saúde nian,” dehan nia.
Entretantu, USAID nia Atividade sustentabilidade Sistema saúde atu ajuda minist’eriu saúde (MS), Instituisaun Nasionál Saúde (INS) no istituisaun sira seluk hodi dejeñu no maneza kualidade servisu saúde ne’ebé di’ak ba Timor-oan hotu.
Jornalista : Sandi Belo
Asisten Editór : Pedro de Almeida
