Lafaek News–Reitor Universidade Nasionál Timor Lorosa’e (UNTL) João Soares Martins informa, atu reativa aula prezensial ba estudantes sira sei hein instrusaun husi Ministeriu Ensinu superior Siensia kultura no husu profesores hotu tenke tuir vasinasaun astrazeneca kompleta.
“Entantu MESK seidauk konvida reitor sira para bele fo instrusaun atu reativa aula prezensial, nune’e ita hein de’it instrusaun husi sira husi governu no MESSK, tanba Karta Komunikasaun formál ba universidade atu reativa aula prezensial ne’e seidauk iha,” Dehan Reitor UNTL João Martins Soares ba jornalista iha Salaun Ian Martin Infordepe Dili , Kinta (22/07/2021).
Reitor haktuir, dala ruma reativasaun ne’e monu iha fulan Agustu, maibé nafatin iha ezijensia katak estudante, profesores no funsionaria sira tenke simu vasina kompleta hafoin bele reativa aulas prezensiál ne’e.
“Dala ruma se akontese iha agustu nia laran di’ak liutan, mas ita nia ezijensia ne’e, ita hotu tenke vasina hotu, tantu profesores tantu estudante i funsionaria sira tenke simu vasinasaun dala-rua ona atu bele permite aulas prezensial ne’e la’o,”nia esplika.
Nia lamenta, karta komunikasaun formál ba universidade atu reativa aula prezensial ne’e seidauk iha maibé se governu deside reativa fali aulas prezensial,ne’e di’ak tebes ba universidade sira no profesores sira tanba bele halao fila fali aula aprendisajen hanesan baibain.
“Estudante UNTL lubuk ida mak seidauk vasina tanba ne’e reitor UNTL apela ba sira ne’ebé seidauk vasina, atu hakbesik an ba fatin vasinasaun ne’ebé Governu prepara ona,tanba aula prezensial ne’e mós nia ezinsesia tenke vasina kompleta mak foin hahu”, hakotu Magnifiku reitor UNTL.
Jornalista : Sonia de Almeida
Editor : Agapito de Deus
