Lafaek News—Família uma kain tolu kompostu husi oan mane na’in rua ho ninia kaben hela hamutuk ho sira nia inan-aman, ho uma ida ho nia medida 6×9, ho kuartu tolu no sala bainaka nian ida, susar atu book an, tanba medida sala bainaka ho kuartu kloot liu.
Uma ne’ebé ho medida 6×9 haketak ho kuartu tolu, didin haleu ho kalen frozen too uma kakuluk, iha ne’ebé hateke husi uma laran ba kakuluk naroman tiru burus husi kalen kuak hanesan fitun sira nabilan iha kalohan leten, no iha tempu udan uma laran nakonu ho tahu nurak.
Uma barraka ne’e rezultadu husi osan terseira idade avó Manuel Mariano, no Francisca da Costa nian, inklui osan subsídiu covid-19 $.200 iha oitavu governu konstitusionál, hodi sosa semente nahe netik iha uma laran, uma laran kloot inklui kuartu rua ne’ebé avo Francisca nia oan mane na’in rua ho sira nia kaben okupa ba.
“Iha tempu ne’ebé udan boot, udan tama husi kalen kuak, uma atu tohar hanehan ha’u ho katuas oan, ami simu osan terseira idade hodi sosa semente ho besi hodi fui rin hodi harii uma ne’e foin metin netik,
Francisca idade (60) no Mariano ho idade (68) husi Aileu bandeira-hun, mai Dili dezde tempu Japanes nian halo toos iha Ailok-laran ne’ebé ohin loron hanaran aldeia Terus-Nain suku Vila-verde, postu administrativu Vera-Kruz, munisípiu Dili.
Avó nain rua iha oan hamutuk na’in neen (6) kompostu husi feto rua mane 4, sira na’in neen ne’e forma ona uma kain, oan ida ho feto na’in rua hela iha uma ketak no na’in rua ho sira nia kaben ho oan hela hamutuk ho avo Francisca ho Manuel Mariano ne’ebé hanesan inan-aman rasik ba sira na’in lima.
Moris iha kondisaun ekonomia ne’ebé la favoravel, oan mane nain rua ho nia sira kaben no oan hela hamutuk iha uma inan-aman nian ne’ebé kloot tebes, laiha servisu tanba la eskola, nune’e moris depende ba rai-henek iha mota Maloa, loro-loron pinera rai-henek hodi fan ba ema seluk ne’ebé presiza rai-henek hodi harii uma, hafoin hetan osan hodi sosa foos haknauk hodi sustenta uma laran.
“Ha’u nia oan mane na’in rua ho sira nain rua ninia fen ami hamutuk uma kain tolu mak hela iha uma ne’e, dada is mos la di’ak, ita boot sira hatene situasaun hanesan ne’e ema sira ne’ebé servisu manan osan moris di’ak, maibé ami ne’ebé laiha servisu hosi iha terus laran, osan laiha sosa foos, ami na’in rua simu osan terseira idade mak foin sosa foos tein ami han,” katak avo Francisca.
Francisca, haktuir moris lor-loron depende ba oan mane nain rua ne’ebé halibur rai-henek iha mota laran, sorte di’ak loron ida hetan netik $10, sorte at semana ida nia laran ema la sosa rai-henek, see hetan netik osan dolar 10, osan ne’e sosa de’it foos hodi han, maibé sosa haknauk de’it hodi tein han.
Iha entrevista ne’e, avó Francisca haktuir nia kaben Manuel Mariano moras atan, kanek iha ain loos iha ne’ebé uluk funu 75 kauza husi morteiru nakkfera sofre infesaun too ohin, no ko’alia hanesan labarik kiik oan tanba idade avansadu liu ona.
“Ami rua nia moris depende ba oan mane sira, uma mos at ona, uma laran kloot, maibé pasiénsia de’it moris mak hanesan ne’e, husu estadu atu labele hanaruk ona serka sanitaria ne’e atu ami nia oan sira bele buka moris hodi sustenta ami nain rua,” lian tristeza husi Avo Francisca.
Iha sesaun ikus entrevista jornaista lafaek news Acacio Pinto ho avó Francisca, hameno katak husu governu atu badak ona serka sanitaria ne’eba, tanba povu kiik sira dada is tebes ba moris ne’e, susar atu buka moris liu husi negósiu kiik, fan bua malus no tunu netik sate iha dalan hodi hetan osan sustenta moris.
“Husu ba ita nia nai ulun sira atu hapara ona serka sanitáriu ne’e, see ami sulan de’it iha uma oinsá ami bele moris, ema sira ne’ebé funsionáriu moris di’ak, maibé kuitadu ami povu kiik ne’e terus kesi kabun tanba hamlaha,” avo Francisca mensajen ikus.
Entretantu, xefe aldeia Terus-Nain, suku Villa-Verde, Paulina Sarmento Barros, haktuir nia parte rekonese kondisaun moris real iha avo Francisca ho nia kaben Manuel Mariano, ne’ebe hela hamutuk ho nia oan mane nain rua ho kaben no oan, hela hamutuk iha uma ida ho medida kloot tebes, sakrifika an ba nesesidade uma laran, tanba depende moris ho pineira rai-henek iha mota Maloa.
“Durante ne’e sira hela hamutuk de’it, ha’u hanesan xefe aldeia rekonese no hatene ha’u nia populasaun sira nia moris, maibe ba uma kain ne’e susar duni ita ko’alia mak la di’ak,” katak xefe aldeia Terus-Nain, Paulina Sarmento Barros ba lafaek news, hafoin akompania ekipa sosial lafaek news vizita uma kain ne’e iha aldeia Terus-Nain foin lalais ne’e.
Entretantu, populasaun kbiit laek ne’ebe hela iha aldeia Terus-Nain, suku Villa-Verde postua administrativu Vera-Kruz, munisipiu Dili, grupu vulneravel hamutuk 51, no kbiit laek hamutuk uma kain 7 mak moris iha krize ekonomia.
Jornalista : Acacio Pinto
Editor : Agapito de Deus
