Lafaek News—Oitavu governu konstituisional lideradu husi Primeiru Ministru (PM) Taur Matan Ruak, deside kontinua trasa liña orientasaun tolu hodi luta kontra Covid-19 nune’e avansa lalais ba faze normalidade.

Eis Prezidente Repúblika no jeneral Taur Matan Ruak hato’o asuntu ne’e hafoin partisipa serimonia entrega vasina Astrazeneka husi governu Austrália ba governu Timor Leste iha Kampung Alor, kuarta  (11/08).

“Foin daudauk governu liuhusi komisaun interministerial Covid ne’ebé ha’u lidera trasa liña de orientasaun tolu importante atu ba oin hodi orienta komportamentu governu nian tomak, liga ba orientasaun ne’e nia objektivu ida deit, halo nusa mak avansa lalais ba normalizasaun,” dehan PM Taur Matan Ruak ba Jornalista sira iha kampo Alor, kuarta (11/08/2021).

PM esplika, orientasaun primeiru maka atu luta kontra Covid zero iha Timor Leste tanba hanesan ilusaun ida, Covid-19 sei la lakon, nia sei hela ho ita, namadiga ita nia dezemvolve hetan mutasaun no variante seluk, i depedendu ninia variante sira ne’e, ninia nivel agresividade aumenta ka diminui ne’ebé kontinua afeta nafatin ita nia sidadaun sira. Entaun moras ida ne’e provavelmente ita sei konsidera hanesan moras baibain no ita sei moris hamutuk ho Covid iha tempu naruk.

Ruak hatutan, iha parte segundu maka kampaña de vasinasaun, dalan mesak atu bele minimiza risku ba sidadaun sira atu lori ita ba faze normalizasaun. Ita define 70%, atu ita fila fali ba normalizasaun, sei posivel ita hetan vasina.

Taur dehan, treseiru, governu hakarak responsabiliza sidadaun sira ne’ebé la simu vasina ba sira nia risku, sira nia vida rasik. Iha tempu badak governu sei ejije funsionariu públiku hotu-hotu ne’ebé servisu iha estadu so tama servisu bainhira iha kartaun vasinasaun, ne’e komesa halo iha universidade sira nomos nasaun balun komesa halo ona no iha Timor-Leste ita sei ejije ida ne’e.

“Provavelmente ita sei uza ida ne’e atu ita nia sidadaun sira labele habitua ejije, akuza governu de’it maibé sira rasik komesa sente katak, ha’u nia saude iha ha’u nia liman rasik, ha’u mate ka ha’u moris sala no los ne’e iha ha’u nia liman, ida ne’e mak dalan tolu ne’ebé mak governu sei uza atu bele orienta komportamentu governu ne’ebé ha’u lidera ne’e ba oin,” Hateten Taur Matan Ruak.

Estajiadu           : Hermenegildo Bubun

Asisten Editór  : Pedro de Almeida