Lafaek News–Julio Soares ne’ebe enfrenta moras mear ran hodi afeta ba neseidade uma laran liu-liu foos iha uma laran laiha, ikus mai hetan apoiu husi Timor oan sira iha sidade Dili hafoin akompania notisia husi lafaek news ho titulu Julio Moras Mear ran, food fohuk hela lata ida de’it iha balde-laran.
Ligadu ho notisia ne’ebé lafaek news fo sai iha loron 09/09/2021, ho titulu, Julio Moras Mear ran, food fohuk hela lata ida de’it iha balde-laran, notisia ne’e provoka sentimentu umanu husi Timor-oan sira hakarak halo karidade kompaixaun ba povu kiik balun ne’ebé presiza tebes tulun, maibé titulu notisia ne’e lori Timor Leste Vision (TL-Vision) too iha aldeia Raimean suku Lahane Oriental hodi fo sira nia tulun ba familia uma kain kbiit laek ida iha fatin ne’e.
Prezidente Timor-Leste-Vision, Abel da Costa hateten,Timor-Leste Vision ho misaun atu haree liu ba area hanesan saneamentu be’e no edukasaun inklui mos ajuda komunidade timor-oan sira liu husi tulun sasan bázika ba komunidade hahú iha loron 5 fulan Abril iha durante inundasaun.
Ami la haree ba ema nia kor, maibe ami haree ema ne’e Timor oan ami ajuda wainhira sasan tama sira presija ami nia tulun ami prontu ajuda,”esklarese Prezidente Timor-Leste Vision Abel da Costa ba Lafaek News iha familia kbit laek nia rezidensia aldeia Raimean suku Lahane oriental, (12/09/2021).
Atividade kariedade ne’e la’os fo de’it ba Julio Soares, maibé TL Vision ajuda ona familia kbiit laek sira dezde dezastre natureza nian iha nasional iha loron 4 Abril 2021, povu barak lakon hela fatin no sasan uma laran iha territoriu tomak.
Servisu jornalista ajuda tebes ami, tanba ne’e ajuda ne’e la’os husi ha’u nian, maibé husi kolega sira iha Austrália, tanba ami iha network ou rede no sira fiar ha’u hodi harii organizasaun voluntariu TIMOR-LESTE VISION hodi fo osan mai ajuda maluk sira iha Timor-Leste,”nia hatutan.
Apoiu ne’ebé organizasaun voluntariu fornese ba familia kbit laek ne’e mak hanesan mina masa 3, foos saka 10 ,saubaun no rinso inklui mos ho osan dollares amerikano $.150, entrega ba familia kbit laek ne’e hodi satan netik hamlaha iha loron balun nia laran.
Iha fatin hanesan familia kbit laek Julio Soares agradese ba média Lafaek News ne’ebé publika ona sira nia lian laek hodi maluk sira seluk bele ajuda netik sira iha tempo susar ida ne’e, maibé nia mos la halihau agradese mos ba ekipa Timor-Leste vision.
Ha’u agradese bo’ot ba ba maluk nebe’e maka ohin mai ajuda ona ha’u iha susar nia laran maibe ha’u laiha buat ida atu fó ba imi iha orasaun atu imi diak nafatin hodi ajuda maluk sira seluk nebe maka moris iha terus no susar nia laran no mos agradese ba lider komunitaria sira ho nia membro,”hateten nia.
Entretantu publikasaun notisia lafaek nian ne’e hatan ajuda husi maluk individu balun ne’ebé lakohi fo identidade no fo ajuda hanesan ai-moruk Salbutamol ho foos saka 2 no supermie kaixa 2.
Jornalista : Manuel Andrade
Editór : Agapito de Deus
