Lafaek News—Timor-Leste sei partisipa iha forum mundiál COP28 iha Dubai, Emiradus Árabes Unidus, ne’ebé sei realiza hahú husi loron 30, fulan-Novembru to’o loron 12, fulan-Dezembru tinan ne’e, no forum ne’e partisipa husi delegasaun hamutuk 200.
Primeiru Ministru Kay Rala Xanana Gusmão informa, TL nian sei reprezenta husi Xefe Estadu José Ramos-Horta hodi partisipa iha forum mundiál ba alterasaun klimátika.
“Prezidente Repúblika José Ramos-Horta mak sei reprezenta TL iha forum mundiál ba alterasaun klimátika (COP28) no TL hanesan membru ki’ik liu iha mundu ne’ebé mós sofre ba alterasaun klimátika la’ós tanba kauza TL nian, maibé TL sofre alterasaun klimátika nu’udar konsikuénsia husi nasaun bo’ot no avansadu sira ne’ebé estraga planeta,” dehan Xanana Gusmão, iha Díli, (30/11/2023).
Xanana informa, iha Outubru liu ba, ekipa TL nian ba iha Tribunál internasionál iha Alemaña hodi deklara kona-bá situasaun sira iha TL no Tribunál internasionál foin halo konsulta kona-bá mudansa klimátika, kona-ba utilizasaun enérjia fósil.
“Tuir lei internasionál, kada país iha direitu ba esplorasaun ba nia rekursu rasik ho kompromisiu atu labele estraga ambiente no ha’u iha esperansa katak Xefe Estadu iha Dubai sei ko’alia mós kona-ba ida ne’e, no sei mensiona mós kona-bá biodiversidade ne’ebé antes ne’e iha Lisboa ha’u koalia ona kona-ba tasi moos,” dehan Xefe Governu.
Timor-Leste hanesan nasaun ki’ik ida ne’ebé lokaliza iha Sudéste Aziátiku no riku ho biodiversidade di’ak liu iha mundu.
Kada nasaun ida tenke iha kompromísiu atu proteze 30% área marítima no TL hein katak, Xefe Estadu sei ko’alia iha forum COP28 ne’e kona-bá TL nia protesaun ba tasi sira parte norte sei, laiha produsaun ba enérjia fosíl no iha tasi sira iha parte norte sei sai hanesan fatin protezidu ba biodiversidade.
Estajiada : Epifania I. Pinto
Editór : Agapito de Deus
