Lafaek News-(Tokyo)-Kinta (11 fulan Maiu 2022), Embaixadór Timor Leste iha Japaun, Ilidio Ximenes da Costa, oficialmente intrega karta nomesaun (Letter of Comission) husi, Ministra Negosiu Estranjeiru no Kooperasaun (MNEK) Timor Leste, Adaljiza Albertina Xavier Reis Magno, ba eis Embaixadór Japaun ba Timor-Leste, Kitahara Iwao hanesan Honorário Konsul Jeral Timor-Leste ba Japaun.
Iha abertura seremonia, Embaixador, Ilidio Ximenes da Costa, hato’o agredesimentu ba representante husi Ministeriu Negosius Estranjeirus Japaun, senhor KANO Takehiro, Direktur Jeral ba asuntu Southwest Asian Affairs no MASUDA Ayako, asistente Direktur ne’ebe partisipa iha seremonia ida ne.
Embaixadór informa katak, nomeasaun ba Honorario Konsul Jeral Timor-Leste ba Japaun hanesan misaun ida nebe importante wainhira nia misaun hanesan Embaixador Timor-Leste ba Japaun.
Embaixador Ilidio Ximenes da Costa mos hateten, Kitahara Iwao hanesan pesoal ida ne’ebe iha relasaun forte ho lideransa Timor-Leste nian no hanesan mos pesoal importante ida ne’ebe iha sosieadade sivil iha Japaun ne’ebé bele ajuda halo koneksaun ba setor privadu sira no organizasaun sira seluk atu nune bele tulun desenvolve ekonomia no Indústria iha Timor-Leste, liu liu- iha area peskas, agrikultura, Tourismu no area sira seluk.
Embaixador mos informa katak, iha 10 novembru 2020, Embaixada RDTL iha Toquio rekomenda ba Governu Timor-Leste atravez Ministeriu Negosius Estranjeirus no Kooperasaun atu bele konsidera no nomeia, Kitahara Iwao hanesan Honorario Konsul Jerál Tmor-Leste, ba Japaun no ikus mai aseita no aprova husi MNEK iha loron 10 fulan Marsu 2022 no aceita husi MOFA Japaun iha loron 6 fulan april 2022. Durante diskursu senhor Embaixador agrede mos ba senhor Kitahara Iwao ne’ebé aseita atu sai Honorário Konsul Jerál Timor-Leste ba Japaun.
Iha seremonia ida ne, representante husi governu Japaun, KANO Takehiro, Direktur Jeral ba asuntu Southwest Asian Affairs, Ministeriu Negosius Estranjeirus Japaun reafirma katak relasaun bilateral nasaun rua nian kontinua hametin nafatin no Japaun tulun nafatin Timor-Leste inklui hamutuk ho Timor-Leste halo promosaun ba paz iha rejiaun pasifuku.
Direktur Jeral mos abrigadu no agradese ba Embaixador, Ilidio Ximenes da Costa no governo Timor-Leste ne’ebe nomeia ona Kitahara Iwao hanesan Honorario Konsul Jeral Tmor-Leste ba Japaun nebe iha kapasidade no experencia barak nebe bele tulun Timor-Leste.
Iha parte seluk, senhor Kitahara Iwao hanesan Honorario Konsul Jeral Tmor-Leste ba Japaun hato’o obrigadu wain ba embaixador no Governu Timor-Leste nebe fiar no nomeia ona nia hanesan Honorario Konsul Jeral Tmor-Leste ba Japaun. Senhor Honorario Konjul agradece mos ba Direktur Jeral ba asuntu Southwest Asian Affairs, Ministeriu Negosius Estranjeirus Japaun no governu Japaun nebe aceita nia hanesan Konjul Jeral Timor-Leste ba Japaun no sei servisu hamutuk ho Embaixada no entidades sira seluk atu tulun Timor-Leste ba oin.
Kitahara Iwao sei estabelece nia eskritoriu oficial iha loron 20 fulan Maio 2022 no hahu halo funsaun hanesan Honorario Konsul Jeral Timor-Leste ba Japaun durante tinan tolu (3) nia laran.(*)
