Lafaek News–Tinan 20 ona Eskola Bázika Filiál (EBF) Ramerhei suku Faturasa postu administrativu Reméxiu, munisípiu Aileu kontinua didin ho au-betun hodi akumula estudantes sira hala’o prosesu aprendizajen.
Eskola EBF Ramerhei harii iha tinan 2000 husi tempu UNAMET ho sala aprendizajen 3 akumula estudante hamutuk 55 kompostu husi mane 28 no feto 27 hamutuk ho manorin nain rua ho estatutu professor permanente no kontratadu
Koordenador EBF Ramerhei, Domingos de Araújo espresa ho sentimentu triste tanba Eskola Báziku Filiál Ramerhei harri dezde tinan 2000 agora kondisaun eskola sei nafatin didin ho au-betun ho kondisaun hamrik hanesan bero nakodko iha iha tasi leten.
Iha eskola ne’e rasik la’os problema ba eskola de’it mak la dun diak Lae Maibe iha Tan problema seluk hanesan menus material iha eskola ne’e no mos fasilidade mos la dun sufisiente tanba iha eskola ne’e rasik sei falta fasilidade hanesan be mos no mos Haris fatin mós laiha,’’katak Domingos ba lafaek news iha Faturasa postu Reméxio foin lalais.
EBF Ramerhei enfrenta difikuldade barak hanesan haris fatin laiha, menus sala de aprendizajen, kondisaun la di’ak bainhira tempu tempu udan ho anin halo susar tebes estudante sira atu aprende ho seguru.
EBF ne’e manorin nain 2 de’it iha kontratadu ida no permanente ida, no eskola ne’e sala de aula 3 de’it no mos kondisaun eskola mos ladún diak no alunos hamutuk nain 55, feto 27, mane 28 mak eskola iha,’’nia afirma.
Professor ne’e sublina, hanesan manorin nain sempre marka enkontru ho xefe aldeia ho inan-aman sira iha aldeia Ramerhei hodi haruka pedidu liu husi karta ba administrador postu too administrador munisipiu, maibé pedidu hirak ne’e seidauk iha responde husi nai ulun sira no mos parte ministériu edukasaun, tanba iha eskola ne’e la diak ona tanba durasaun konstrusaun tinan 20 ona.
Nia haktuir, sala aprendizajen tolu ne’e utiliza nu’udar multi-funasaun kompostu husi fatin ba professor nain rua hodi enkontru ho bibleóteka, tanba fatin alternativu laiha, ho maromak nia tulun iha 2022 hetan apoiu husi PLAN Internasional mak harii fali uma ida didin ho kalen hodi funsiona ba fatin manorin ho bibleóteka.
Nia dehan liu husi lia anin huu too ona nia tilu katak fulan Agostu 2022, iha ona sinal atu harii tan sala aprendizajen 5, maibé seidauk iha esperansa, tana governu ida ne’e nia mandatu mos atu hotu, fulan Agusto ba oin governante sira fokus ona ba sira nia partidu hodi prepara hasoru eleisaun 2023.
Informasaun katak iha fulan Agostu ne’e atu harii tan sala de aula 5 ba iha EBF Ramerhei maibé hanesan informasaun de’it maibé seidauk hatene lolos, Ita hein de’it,’’katak Domingos Araújo.
Jornalista : Nicolau Fernandes
Editór : Agapito de Deus
