Lafaek News--Ministru Administrasaun Estatál (MAE), Miguel Pereira de Carvalho informa, Sekretariadu Téknika Administrasaun Eleitorál (STAE) sei estabiliza sentru votasaun paralelu tolu iha Dili hodi permite ba eleitór ne’ebé labele ba sira nia munisípiu hodi tuir votasaun iha loron 19 fulan Marsu 2022.
Ami informa ona ba lideransa komunitáriu sira, Xefe suku sira hotu atu informa ba sira nia populasaun sira iha sira nia hela fatin, ba populasaun sira ne’ebé iha eleisaun lakoi fila bele informa ba Xefe suku sira, para Xefe suku sira relata ba iha STAE Munisipál para sira nia naran bele mosu iha sentru votasoens paralelo,” dehan MAE Miguel de Carvalho hafoin hasoru malu ho Primeiru Ministru Taur Matan Ruak, segunda (07/02/2022).
Governante ne’e akresenta, Ministériu Administrasaun Estatál (MAE) halo ona kolaborasaun ho Ministériu Ensinu Superior Siénsia no Kultura (MESSK), hodi informa ba universidade hotu, karik alunus sira ne’ebé iha eleisaun labele fila bele rejistu liuhusi universidade depois informa ba STAE, nune’e sira nia naran bele mosu iha sentru votasaun paralelo iha Dili.
Aleinde ne’e hakerek mós karta na Ministériu Saúde hodi informa ba sidadaun sira ne’ebé mak iha tempu antes eleisaun, labele fila ba sira nia hela fatin tanba halo hela tratamentu iha ne’e bele informa ba STAE hodi Bota iha Dili.
Ha’u atu informa dala ida tan, katak bele vota iha sentru votasaun sira iha Dili maibé, sira tenke informa ba STAE antes, para ke sira nia naran ne’e bele mosu iha sentru votasoens paralelu, ” informa MAE
Nia argumenta, karik la informa ba STAE no naran la mosu iha sentru votasaun paralelu entaun labele vota iha Dili, tenke fila ba unidade jeográfika suku ida-idak nian bazeia ba kartaun eleitorál.
Jornalista : Juvita dos Santos
Editor : Agapito de Deus
