Lafaek News–Prezidente Partidu Sosialista de Timor (PST), Avelino Coelho Shalar Kossi FF, ho Prezidente Comisaun Diretiva Nasional partidu CNRT, Dionisio Babo, lansa portal ofisial kandidatu Prezidente Republika periodu 2022-2027 numeru sorteiru 14, Premiadu Nobel ba Paz, Jose Ramos Horta.
Lansamentu refere realiza iha sede nasional kandidatura José Ramos Horta, iha Aimutin, tersa (01/03/22), pájina ho naran VOTA ba Dr José Ramos Horta https://web.facebook.com/108361548448775/posts/114532797831650/?flite=scwspnss&_rdc=1&_rdr objetivu atu fasilita publiku sira bele asesu diretamente informasaun kona-ba atividade kampania.
Ha’u hamutuk doctor Avelino Shalar Kossi nu’udar portavos movimentus politika legais, hau Dioniso Babo portavoz asuntus relasionadus partidu CNRT ba kandidatura Jose Manuel Ramos Horta, ami nain rua lansa página sosial hanesan portal ba publiku hodi informa asuntus hotu relasionadus kampania prezidensial ne’ebe sei komesa iha loron 2 fulan Marsu 2022, ba kandidatu Prezidente Repúblika José Ramos Horta,’’ Babo informa.
Nia esplika kona-ba portal ofisiál ne’e publiku bele akompania iha pájina laran hodi haree informasaun hotu-hotu kompostu husi programas, objetivus no saida de’it mak kandidatu Prezidente Repúblika períodu 2022-2027, José Ramos Horta halo bainhira simu hikas mandatu foun nu’udar xefe estadu.
Porta ne’e mos bele asesu informasaun seluk relasaun h orárius no plataformas polítikas ne’ebé doutor José Ramos Horta hamutuk ho partidus CNRT inklui movimentus oi-oin hodi apoiu prezidente repúblika Timor nian iha 2022-2027,’’ afirma Dionisio Babo.
Iha sorin seluk, Avelino Coelho Shalar Kossi FF, nu’udar portavoz movimentus polítika legais, fundamenta lansamentu pájina ofisial ida la’os de’it instrumentu propaganda, maibé hanesan mos matan dalan ba edukasaun eleitoral.
Karik eletores sira iha dúvidas kona-ba programas repozisaun da orden demokrátiku konstitusional, dúvida ka la fiar karik, tanba sá mak ami defende partidu CNRT ho movimentu hotu-hotu ne’ebé apoiu kandidatura Prezidente Repúblika José Ramos Horta ba periodu 2022-2027, eleitu ba prezidente, bainhira eleitores sira sei la fiar bele asesu direta pájina ofisial ne’e hodi diskute no husu esklaresimentu no provas katak, tanba saida partidu CNRT iha konferensia aporva rezolusaun ba repozisaun orden demokratika konstitusional,’’ Avelino esklarese.
Shalar Kossi FF sublina, pájina sosial ne’e la’os atu halo de’it propaganda ka ajitasaun polítika, maibé nu’udar instrumentu hodi eduka eleitoral sira hotu iha Timor Leste.
Jornalista : Agapito de Deus
Editor : Floriano Soares
