Lafaek News-Sekretáriu Estadu Terras no Propriedades (SETP) rekolla ona miliaun 4,2 hosi sidadaun ne’ebé mak utiliza uma no rai Estadu nian.
Iha sorumutu Sekretáriu Estadu Terras no Propriedades, Mario Ximenes informa ba Primeiru Ministru (PM) Taur Matan Ruak, kona-ba kna’ar iha terras propriedades, duranre tinan 2019-2020 konsege rekolla ona osan millaun 4.2.
“Hanesan membru governu haree katak pasta ida ha’u kaer ne’e, la’ós apoiu masimu ba polítika da-ualu, maibé uituan iha, ne’e maka informa ba primeiru ministru kona-ba ami nia rezultadu servisu hanesan 2017-2018, rendiementu millaun $2. ital, maibé ami bele atinji to’o millaun $ 4,2 iha tinan ida nia laran,” dehan SETP Mario Ximenes, ba jornalista sira hafoin hasoru malu ho Primeiru Ministru, Taur Matan Ruak, iha palásiu governu, Tersa, (19/01/2021).
Nia hatete, hanesan membru governu ida ne’ebé hetan orientasaun polítika hosi leten, katak polítika governu da-ualu nian hakarak atinji objetivu ida ne’ebé maka iha rendimentu sustentavel nomós absolve traballadores sira.
“Ami atinji kuaze 90 pursentu, ho situasaun polítika ne’ebé ladun iha estabilidade nomós surtu Covid-19, maibé terras atinji ida ne’e, liuliu ami husu ba governu enjeral atu apoiu netik ami nia servisu lor-loron atu bele hasae liu tan objetivu ne’ebé ita atinji,” nia informa.
Nune’e mós, kontrata arendamentu rai estadu instituisoens privadas pessoais sira ne’ebé utiliza rai estadu no kontrata arenda ho rai estadu ida ne’e maka sira selu, hahú kedas hosi 2003 mai to’o ohin loron nia prosesu kontinua la’o.
“Ha’u labele fó nia presu total, maibé so bele hatete de’it, embaixada rua nia presu fiksu maka embaixada Xina $11 mill kada fulan no Embaixada America $12 kiik kada fulan, restante tun mai okos tanba sira okupa rai ne’ebé maka preimeira klasse, hanesan habitasaun sira husi $10 to’o $25 kada fulan,” nia esplika.
Nia dehan, dadaun ne’e mós komesa sensiviliza ba komunidade ne’ebé maka uza rai estadu no uma estadu tenke rezista.
“Komunidade hotu hotu presija atu hatene, tanba wainhira estadu atu presiza fila fali rai ne’ebé komunidade uza ne’e estadu bele responsabiliza tanba tuir ona prosedur administrativu, maibé husu ba maluk sira ne’ebé uza rai estadu bele mai rejista, ita sei laprega presu ida ne’ebé maka hamate sira, maibé presu ne’ebé mak razoavel para komunidade sira bele asesu,” nia hakotu.
Jornalista : Pedro de Almeida
Editór : Floriano Soares
