Lafaek News—Sekretáriu jerál komite 12 de Novembru, Sérgio Filomeno Marques, liu husi atividade seminar imforma, iha prosesu libertasaun patria hotu ona atu libertasaun povu presija ema hotu nia kontribuisaun ba desemvolvimentu.
Sekretáriu jerál komite 12 de Novembru, Sérgio Filomeno Marques, hato’o asuntu ne’e hafoin partisipa iha atividade seminar ne’ebé organiza husi Klibur Juventude Foinsa’e (KFJ’s) ho tematiku tane a’as herois 12 Novembro 1991 sai hanesan inspirasaun ba jovetude iha prosesu dezenvolvimentu.
“Iha prosesu libertasaun ba patria hotu ona, maibé prosesu libertasaun povu presiza ita nia kontribuisaun,” dehan Sekretáriu jerál komite 12 de Novembru, Sérgio Filomeno Marques, iha sede suku Bidau Santana, kuarta (10/11/2021).
Sekretariu Jeral Komite 12 Novembro, mós husu ba joven sira presija aprende no buka istória luta Timor-Leste nian hanesan 12 Novembru 1991 no 1975-1999.
“Ha’u tenta explika ba sira katak 12 de Novembru ne’e hanesan estratejia luta ida ne’ebé mak bele konvense mundu tenke hatene prosesu tanba-sá mak iha 12 de novembru, entaun ho estratéjia sira ne’e oinsa mak dalan ida konvense mundu husi akontesimentu katak nasaun hotu iha ONU ne’ebé fó kedas prioridade ba ita nia luta ba nasaun Timor-Leste,” nia esplika.
Iha fatin hanesan Fundadór Klibur Juventude Foinsa’e (KFJ’s), Alexandrino Menezes, haktuir, aktividade seminar ne’e realiza atu lembra hikas fali sira ne’ebé terus ba rai ida ne’e no haforsa fila fali juventude ida agora hodi luta no kontribui ba dezenvolvimentu nasaun.
“Ita nia nasaun presiza ita hotu nia tulun no la presiza ita husu ita nia nasaun katak saida mak nasaun fo ba ha’u, maibé hanesan Juventude Timor oan saida mak ha’u tenke halo ba ha’u nia nasaun ida ne’e,” dehan Alexandrino Menezes.
Jornalista : Crecensia Fereira
Asisten Editora : Juvita dos Santos
