Lafaek News–Sekretáriu Estadu Komunikasaun Sosiál (SEKOMS), Mericio Juvinal “Akara”, ohin segunda (21/02), ofisialmente loke formasaun ba formandu foun iha nivél nasionál hamutuk 184 hodi tuir formasaun iha Sentru Formasaun Téknika Komunikasaun (CEFTEC) iha tinan 2022.
Totál tinan ne’e hamutuk ema 184 ne’ebé maka sei partisipa ho materia oin-oin liga ba multimedia, radio, hakerek notisia, lingua tetun,” dehan SEKOMS Mericio Juvinal Akara ba Jornalista sira hafoin abertura formasaun ne’e iha Salaun MSSI Kaikoli Dili, segunda (21/02/2022).
Nia informa, formasaun ne’e mós fó oportunidade ba maluk sira husi Forsa Falentil Defeza Timor-Leste (F-FDTL), Polisia Nasionál Timor-Leste (PNTL) no media sira.
Iha fatin hanesan Koordenadór Sentru Formasaun Tékniku Komunikasaun (CEFTEC), Rafael Freitas hatutan, formasaun ne’ebé ohin abertura ne’e hamutuk Unidade walu (8).
Unidade walu hanesan unidade Portugéz ba Jornalista, unidade hakerek imprensa, lian tetun, rádiu, televisaun, multimédia, unidade protokolu no jestaun Krize” Subliña Nia.
Enkuantu formandus sira ne’e mai husi nivél nasionál hamutuk 184, kompostu husi liña ministeriál hamutuk nain 60 resin, balun mai husi Jornalista, no seluk mai husi instituisaun públiku no privadu sira ne’ebé mak iha interese hakarak tuir.
Jornalista : João da Costa Soares
Asistén Editora : Juvita dos Santos
