Balibo (Lafaek News)—Sekretaria Estadu Komunikasaun Sosial (SEKOMS), Expedito Dias Ximenes, 15/10/2025, ofisialmente lansa Radio Komunidade Fronteira Balibo Five hodi fornese informasaun ba komunidade tomak iha fronteira Balibo.
Diskursu SEKOMS Expedito Dias Ximenes iha ámbitu inagurasaun nia salienta, inagurasaun Radio Komunidade Fronteira Balibo Five ho objetivu fundamentu fo omenájen ba jornalista nain-lima ne’ebé mate hodi defende lia-loos.
“Ohin loron ne’ebe importante no istóriku tebes, istóriku tanba edifisiu ida ne’e, loron istóriku tanba jornalista nain lima, ita koñese katak iha situasaun difisil jornalista nain lima husik hela sira nia servisu husik hela sira nia familia i sakrafísiu bo’ot defende lia-loos, defende dalan loos husik defende ita nia liberdade, defende direitu povu Timor-Leste, tan ne’e edifisiu ida ne’e ita bele tau naran Rádio komunidade Fronteira Balibo Five atu bele ita fo omenájen ho ita nia respeitu no onra gloria ba ita nia jornalista nain lima,” Expidito Dias Ximenes ba jornalista hafoin remata inagurasaun radio komunidade Balibo Five, iha Balibo-Vila, Kuarta 15/10/2025.
Governante ne’e esklarese kona-ba Radiu Komunidade Fronteira Balibo Five nia papel mak atu atende atividade komunidade nian hanesan komunidade sira kuda modo no komunidade sira halo atividade ne’ebe mak diak, ida ne’e rádiu komunidade nia servisu atu halo kobertura atu fornese informasaun ba públiku.
polítika IX governu konstituisional ba dadaun, iha radio komunidade hamutuk 21, aumenta tan ho radio komunidade fronteira Balibo five hamutuk 22, katak IX governu konstituisional sente no fo prioridade, tanba radio komunidade mak liña frente fo informasaun ba komunidade, liña frente tanba radio komunidade ne’e forma ou kria husi komunidade ne’e rasik governu apoiu de’it oinsá dezenvolvimentu ba jestaun no ekipamentus ne’ebe persija, liu-liu iha transmisaun radio ne’e nian.
“Radio komunidade nia papél prinsipál mak nia atu atende atividade komunidade nian hanesan ezemplu karik se bainhira toos nain ida hein karau, ida kuda modo Ida bainhira nia halo atividade ida ne’ebe diak, ida ne’e radiu komunidade nia servisu atu halo kobertura ne’e la signifika katak kobertura ba iha dirijente estadu nian la halo, maibá ha’u sempre fo hatene radio komunidade sira iha munisipiu hotu-hotu se bele 60% atividade ba komunidade no 40% ba atividade governu ka estadu nian iha aldeia, iha suku, iha postu adminsitrativu no munisipiu tanba populasaun tenki sente katak radio ne’e ninian se-radio ne’e ninian tenki sente katak nia atividade ne’e ema hotu-hotu bele hatene tan ne’e iha radio komunidade hotu iha formatu rua ida nia halo kobertura no ida nia halo talk show, talk show katak nia konvida joven ka veteranus, lia-nain sira mai iha ne’e atu hato’o sira nia esperensia ba joven sira konvida mos joven talentu diak atu mai hodi hatudu sira nia talentu ba populasaun sira katak ami nia talentu mak ne’e ,tan ne’e tenki iha servisu barak liu ba iha komunidade,” governante ne’e rekomenda.
Radio nia funsaun hanesan media imparsial, radiu komunidade tenki haree liu ba komunidade nia servisu no komunidade nia atividade no radio komunidade sira mos presija tau atensaun husi Autoridade Postu Administrativu sira iha postu adminsitrativu no prezidente autroridade munisipiu,
“Ami halo hela kooperasaun ho Ministériu Administrasaun Estatal, iha orsamentu jeral 2026 iha postu adminsitrativu sira sei tau atensaun tomak ba iha radio komunidade liu-liu iha nia jestaun no iha jestaun tékniku ne’e responsável SEKOMS nian hamutuk ho Konsellu Imprensa, no KI nudar orgaun regulador ba iha media hotu-hotu no radio komunidade mos tama hotu iha media ne’ebe iha komunidade nia le’et,” nia hakotu.
Observasaun jornalista lafaek news nota, iha serimonia inagurasaun Radio Komunidade Fronteira Balivo Five, hetan partisipasaun hosi autoridade lokal, lia-nain, juventude, polísia eskuadra Balibo, Padre Pároku Balibo, no tesi fita direta hosi Seketariu Estadu Komunikasaun Sosial, Expedito Dias Ximenes no Administrador Postu Balibo no hetan bensaun hosi Pe. Parókia Balibo no radio ne’e ho nia frekuensia 98.3 (Mhz)
Jornalista : Trifónio Araújo
