Lafaek News–Sekretariu jerál Organizasaun Rezisténsia Sagrada Familia (ORSF) husu membru ORSF iha territoriu nasional atu partisipa aniversáriu ba dala-33 ne’ebé eziste tempu okupasaun hodi luta hasoru invazor illegal ba povu Timor Leste.
Sagrada Família nu’udar organizasaun rezisténsia harii durante funu ho objetivu luta kontra okupasaun ilegal husi militár Indonézia iha territóriu Timor, too ohin Timor Leste manan funu husi invazor nia liman.
Apela ba membru tomak atu mai partisipa iha selebrasaun aniversariu ba dala- XXXIII (33), selebrasaun ne’e mos hanesan dever obrigasaun ida ba membru ORSF halo serimonia ritual no fiar metin tuir dalan ORSF nian, tuir planu sei hala’o iha munisípiu Vikeke postu administrativu Uatulari ne’ebé decide husi fundador no orgaun diretiva ORSF,’’katak Aquelina liu husi konferénsia imprensa ba jornalista sira iha sede ORSF Fatuhada Dili, sesta (01/07/2022).
Tuir nia, programa tuir mai molok selebra loron moris ORSF sei hala’o uluk retiru ne’ebé sei derije husi eis komandante no konselleru ORSF Taur Matan Ruak atual primeiru ministru oitavu governu konstitusional, Lere Anan Timur no L7, objetivu husi retiru refere mak reflesaun klean ba Timor Leste ohin loron hodi hetan prospéru iha futuru.
Programa importante ne’ebé sei hala’o iha selebrasaun ne’e mak hanesan konferénsia munisipal, retiru nasional no hala’o serimonia ritual sagrada família nian.
Estajiadu : Julião Pacheco
Editor : Agapito de Deus
