Lafaek News–Sekretariu Jeral Partidu Frente-Mudança (P-FM), Daniel Pereira konsidera kongresu ne’ebé organiza husi eis prezidente Interinu Frente-Mudança Egidio de Jesus realiza iha Likinta aldeia Alecrim ilegal, tan ne’e husu militantes sira kalma no kontinua konsolida hodi buka militante foun.
Ha’u hanoin nu’udar sekretariu jeral husi rezultadu kongresu loron tolu nian, ami hakfodak ho kapturasaun senhor Egidio de Jesus iha dia 23 dader, maibé ita hotu tenke hakruuk ba lei, iha opiniaun publiku oi-oin katak ho kapturasaun ne’e prejudika ba partidu Frente Mudança ne’e ha’u nu’udar sekretariu jeral atu dehan sei la prejudika partidu,’’katak Sekretariu Jeral Partidu Frente-Mudanca, Daniel Pereira ba lafaek news iha pantai kelapa foin lalais.
Sekretariu jeral P-FM ne’e mos fundamenta kona-ba kazu partidu Frente Mudança nian mosu kedan dezde tinan kotuk liubá públiku hatene katak partidu FM husi lideransa nasional, kuadrus too militantes no simpatizantes hotu sira hakarak partidu ne’e sai ida de’it, labele iha grupu oi-oin iha partidu laran.https://www.lafaeknews.tl/egidio-rejeita-alegasaun-falsa-halakon-osan-husi-prezidente-ho-sekjen-ilegal-fm/
Ida ne’e, ha’u hanoi partidu ida ne’e iha dutrina klaru katak tenke luta ba lia loos, se ita luta ba lia-loos, kazu ne’ebé atu afeta ba ema barak nia moris no krime ita labele taka, ita tenke fo sai atu estadu ida ne’e aplika duni, tanba ne’e mak partidu ida ne’e brani solusiona rasik dezintendimentu internal,’’ Sekjen FM ne’e sublina.
Hodi dehan, Partidu Frente-Mudança mak bele hapara lideransa ne’ebe deskonfia envolve iha kazu korrupsaun, ezemplu konkreta iha 2015 partidu deside hapara imediatu sekretariu jeral liu husi konferénsia nasional no iha momentu ne’e, konferensia realiza antes eleisaun parlamentar 2017.
Agora ami mos suspende prezidente interinu partidu Frente Mudança nian iha 2021, tanba deskonfia komete osan partidu nian, krime tenke krime, se krime oinsá ita bele halo komunikasaun, agora kazu perdata oin seluk, más kazu krime ne’e ita husik ona ba estadu mak tenke aplika lei,’’afirma nia.
Daniel espresa, nu’udar pesoal sente triste, tanba akontese tiha ona, maibé husik justisa mak sei hatudu lia-loos no sala, aleinde ko’alia kona-ba luta hamenus kiak iha rai-laran, maibé labele husik hela korrupsaun buras iha rai-laran, partidu Frente-Mudança eziste atu kontribui halakon korrupsaun.
Tuir lo-loos partidu sira seluk tenke agradese ba partidu Frente-Mudança,’’katak Daniel.
Sekretariu jeral P-FM ne’e akresenta, partidu Frente Mudança ida de’it ho naran Frente-Mudança, kazu ne’ebe mosu iha internal partidu tanba osan no osan ne’e povu nian, tenke iha desizaun koletivu husi estrutura nasional mak bele orienta foti osan ne’e, labele ema ida-idak ba foti tuir nia hakarak sein razaun fundamentál no laiha justifikasaun.
Tan de’it kazu osan partidu nian ne’e, balun hili nonok no balun mos hakarak apoiu grupu, tanba ne’e maioria iha partidu Frente-Mudança, ami sira ne’ebe lori kazu ne’e atu hatoo katak, osan partidu ne’e ema barak nian, ita labele halimar ema ida mak foti osan hodi gasta mesak-mesak, ne’e maioria la konkorda aktus hanesan ne’e, enkuantu maioria foti desizaun iha grupu balun protesta, más ne’e normal, partidu kuandu la’o ne’e desizaun maioria nian, ami fiar membru CPN momentu ne’eba asina kedan deklarasaun ida hodi bandu senhor Egidio de Jesus labele asesu konta bankária tanba foti osan la informa ba sekretariu jeral ne’ebe iha kompeténsia no ha’u rasik tama iha sistema konta bankária nian mos la hatene,’’ tenik Sekjen FM ne’e.
Daniel afirma tan bazeia ba kazu hirak ne’e mak mosu kongresu nasional durante loron tolu nia laran tuir estatutu partidu nian molok hal kongresu tenke halo uluk konferénsia municipal kompostu husi 13 munisípiu ho RAEOA, no sira husi konferénsia municipal ne’e mak sai fali delegadu iha kongresu nasionál.
Kongresu loron tolu husi 27 too 29 ne’e kongresu ne’ebé legál, rezultadu husi kongresu ne’e hatoo ona ba orgaun kompeténsia sira hanesan Tribunal Rekursu no hetan reposta informadu no publika ona iha jornal repúblika, entaun kongresu ne’ebé senhor Egidio de Jesus halo ne’e ilegal, tanba kongresu halo tiha ona, tanba sa tenke halo tan, momentu ami halo kongresu ne’e nia (Egidio de Jesus) haree ho matan, tanba saida nia la mai koopera ho ami, nu’udar umanu triste tanba ita laiha problema pesoal, kestaun tanba partidu ne’e ema barak nian,’’ Daniel afirma.
Iha okaziaun ne’e, Sekretariu Jeral Partidu Frente Mudança ne’e husu kuadrus, militantes no simpatizantes tomak katak relasiona ho kapturasaun eis prezidente interinu partidu Frente-Mudança nian, sei la afeta ba partidu, husu kuadrus hotu kontinua halo servisu hanesan bai-bain hodi hasoru eleisaun parlamentár 2023.
Jornalista : Aniceto Dias
Editor : Agapito de Deus
