DILI (TOP)–Alin husi saudozu Nicolau Lobato atual eis kandidatu prezidente repúblika 2022-2027, Rogerio Tiago Lobato, konsidera Prezidente Repúblika Francisco Guterres Lú Olo atual Prezidente partidu Fretilin ho sekretariu jerál Marí Alkatiri viola estatutu FRETILIN ho razaun tinan 20 ona lakohi sai husi estrutura.
Nicolau Lobato nia alin Rogerio Lobato hatoo asuntu ne’e liu husi nia intervensaun polítika iha kampaña kandidatu prezidente repúblika númeru 1 Premiadu Nobel da Paz, José Ramos Horta, iha Tasi-Tolu, tersa (12/04/22), hodi hateten prezidente partidu FRETILIN ho nia Sekretáriu Jerál durante tinan 20 kaer FRETILIN lakohi sai hakarak mate de’it iha ne’ebá hodi hases tiha ema sira ne’ebé família sai oan kiak no feto faluk ba FRETILIN.
FRETILIN tenke fó ba ema ne’ebé terus mate ba rai ida ne’e, lakon buat hotu ba rai ida ne’e. Sira la viola de’it konstituisaun RDTL, maibé sira mos viola estatutu FRETILIN nian,” hateten eis komandante FALINTIL iha 1975 ne’e iha Tasi-tolu.
Rogerio argumenta, razaun Lú Olo kandidata an hanesan independent tanba nia hatene hela viola estatutus FRETILIN, tanba ne’e husu militantes partidu FRETILIN tomak iha territoriu nasionál labele fiar tan Lú Olo ho Marí Alkatiri.
Ha’u husu ba imi kamarada FRETILIN sira labele tuir ema hanesan bibi malae ne’e labele, FRETILIN la’os grupu ida nian maibé ema rihun ba rihun nian,” nia hateten.
Fundador FALINTIL ne’e fundamenta, kandidatu Prezidente Repúblika José Manuel Ramos Horta mak ho nia maluk balun sei moris no balun mate ona mak funda ASDT hodi transforma FRETILIN, ikus komandante Xanana Gusmão kontinuador obra Prezidente Nicolau Lobato nian.
Iha sorin seluk, Prezidente bankada CNRT kestiona governu tanba abandona vítima husi lalubur (inundasaun) balu sei kontinua hela iha lona okos ho kondisaun ne’ebé la merese.
Ami haree sira iha jestaun di’ak, ha’u hanoin ita presiza iha edifisiu ba sira ne’ebe mak abandona, sira ne’ebe ko’alia iha meza para hadia Kazu dezastre naturais sira ne’ebe bele akomoda ita nia ema sira ba ne’eba, duke ita tau iha lona ou lona depois abandona tiha sira tenke barak, dehan Duarte Nunes ba jornalista sira iha resintu Parlamento Nasional Dili,Tersa (12,04,22).
Duarte Nunes afirma, populasaun sira ne’ebé vítima ba dezastre naturais hela nafatin iha lona okos, laiha kondisaun ida di’ak ba sira, signifika governu laiha planu asaun ida ne’ebé di’ak hodi normaliza hela fatin hodi haruka vítima sira fila ba sira nia hela fatin.
Depois moris barak iha lona okos, laiha kondisoes ba liuliu labarik sira ne’ebe mak moris iha lona okos, ida ne’e mensajen ba ita katak, ita labele halo asaun balu akontese ona dezastre, tenke iha prevesaun tenke hanoin ba dook, tanba dezastre naturais sira ne’e la’os ne’ebe ita hatene tinan-tinan sempre iha ne’ebe ha’u haree infranstrutura kona-ba dezastre sira ne’e seidauk iha planu ne’ebé di’ak atu prevene, atu kria kondisones bainhira akontese ne’e bele akomods ita nia ema sira ne’e ho dignu,’’ Duarte Nune’e hakotu.
Entretantu, liga ho notisia ne’e jornalista tenta atu konfirma ho prezidente partidu FRETILIN ho sekretariu jeral Marí Alkatiri, maibé la konsege tanba laiha fatin,
Estajiadu : Eco Fernandes
Editor : Agapito de Deus
