Lafaek news—Lider nasionál no Eis Ministru Interior primeiru governu konstitusional, Rogéiro Tiago Lobato, sente orgullu tebes ba komemorasaun loron importante ida ne’e no povu hotu sente ona, maibé dezenvolvimentu ba povu seida’uk di’ak.

Alin husi Nicolao Lobato ne’e hato’o kestaun ne’e iha ámbitu komemorasaun loron proklamasaun independénsia ba dala 48, Tersa (28/11/2023), hodi dehan ukun na’in sira hamutuk ona hodi resolve dezenvolvimentu iha rai ida ne’e ba povu hotu-hotu hodi sente no goza duni liberdade.

“Ha’u kontente tanbá ita liu terus barak, ita nia ema barak mak mate ba rai ida ne’e, mate liu atus rua lima nulu resin, dehan rihun atus tolu populasaun iha tinan 1975 la bo’ot ida la to’o millaun 1, ne’ebé Timor ninia luta ne’e ema mate barak tebe-tebes, mezmu ita mate barak maibé ita kontente tanbá ita bele ukun rasik an,iha 1975 ita sempre dehan mate ka moris ukun rasik aan, Rogéiro dehan.

Nia hatutan, Mezmu liu husi terus oin-oin triste bo’ot bele lakon ba rai ida ne’e, bele hetan dezafiu ida ne’ebé sempre hato’o ba idak-idak ninia an rasik dehan hetan ukun rasik aan.

“Ha’u sente katak dezenvolvimento ne’e la akontese iha tinan rua tinan tolu nia laran, dala ruma ita halo mos erus balun maibé ha’u sente governu agora dadaun kaer ukun ne’e nia sei hare’e ba erus sira ne’ebé komete ona ba liu tinan liman liu ba para oinsá independénsia ne’e bele duni moris di’ak ba ita nia povu,ema barak hakarak independénsia ukun rasik aan tanbá hakarak moris di’ak, ita tinan rua nulu ona restaura ita nia independénsia maibé ita hare’e katak ema barak seida’uk moris di’ak, joven barak sei ba rai-li’ur buka moris no ema barak fa’an sira nia sasan dala ruma hetan de’it dolar ida ou rua iha loron ida, ha’u sente independénsia ne’e lider sira tenke tu’ur hamutuk hanoin hanu’usá atu lori duni moris di’ak ba povu ida ne’e, tan,” katak lider istóriku ne’e.

 Nia haktuir, Ukun na’in sira hamutuk ona hodi resolve situasaun rai-laran, sente fukun lolós ne’e mak tenke hamutuk ona, kuandu luta ba libertasaun hotu-hotu hamutuk kontra okupasaun maibé kuandu manan tiha independénsia tansá lahamutuk hodi hare’e problema barak iha rai laran.

Nia salienta tan, Iha komemorasaun loron importante ida ohin hare’e katak husi Ministériu administrasaun Estatál fahe mos konvite ba lider hotu-hotu maibé lider balun hetan tiha konvite la marka prezensa iha fatin ida ne’e, ida maka  sai kestaun bo’ot ida.

Iha Fatin hanesan partisipante Virgilio da Costa Sampaio aumenta tan, Nu’udar juventude hakarak agradese tebes ba ukun na’in no luta nain sira ne’ebé halo esforsu durante tinan naruk nia laran to’o hetan ukun rasik aan, loron ida ohin espesiál tebes ba povu doben rai Timor-leste tomak.

“Ha’u orgullu tebes tanbá ho sira nia luta ohin loron ita liberta pátria, liberta nasaun ida ne’e, tanbá hakarak tebes ba prosesu dezenvolvimentu ne’e tenke luan ona iha teritoria nasionál no rai Timor-Leste laran tomak, nune’e povu ki’ik bele sente no goza ona ukun aan ida ne’e,” hakotu nia.

Jornalista : Epifania I.Pinto

 Editor        : Paulo Collo