Lafaek News—Primeiru Ministru Taur Matan Ruak, afirma renovasaun estadu ba dala-11, sei abranje ba territorial tomak funsiona hahú husi loron 4 Marsu 2021.
“Estadu emerjénsia, da-daun ne’e renova, abranje teritóriu nasionál tomak no vigora hahú entre oras 00.00 iha loron 4 fulan marsu tinan 2021 to’o oras 23.59 loron 2 fulan abril tinan 2021″ aprezenta Primeiru Ministru Taur Matan Ruak iha reuniaun Konsellu Ministru iha Palasio Governu Dili, tersa (02/03/21).
Hodi dehan ein jerál mantein medida sira ne’ebé maka antes ne’e aprova ona, li-liu bandu atu passa fronteira ba fins tradisionál ka kustumeiru nian atu asesu ba merkadu reguladu no obriga sirkulasaun internasionál hala’o de’it liu husi postu fronteira.
Tanba ne’e bele taka tuir desizaun Ministru Interiór bainhira razaun seguransa ka saúde públika justifika sujestaun ba ema hotu ne’ebé hakarak tama ka sai husi teritóriu ba kontrolu sanitáriu, impede sirkulasaun internasionál ba ema hotu ne’ebé aprezenta sintoma infesaun SARS no COVID-19, impozisaun ba izolamentu prolifilátiku (kuarantena) ba ema hotu bainhira tama iha teritóriu nasioná.
“Nune’e sujestaun ba ema hotu ne’ebé diagnostikada COVID-19 ba izolamentu terapéutiku,” katak xefe governu ne’e.
Taur akresenta tan, durante vijénsia diploma ne’e, ema hotu ne’ebé hela iha Timor- Leste, tenke mantein distánsia, pelu menus, metru ida ho ema seluk ne’ebé la hela iha ekonomia komun, utiliza máskara oin nian hodi taka inus no ibun bainhira asesu iha fatin públiku ho privadu no ba utilizasaun koletiva, fase liman bainhira hakarak tama ba iha estabelesimentu komersiál sira, industriál ka prestasaun servisu ka iha edifísiu iha ne’ebé hala’o servisu administrasaun públika.
Oras ne’e prevee posibilidade atu suspende temporária prosesu ensinu no aprendizajen, iha rejime prezidensiál, karik departementu governamentál responsavel ba saúde publika rekomenda ho efeitu atu hamenus risku transmisaun SARS-CoV-2.
Enkuantu dekretu governu ne’e prevee katak familia sira husi ema misaun diplomátika sira nian ne’ebé akreditada iha Dili bele mós kumpri períodu izolamentu profilátiku iha fatin ne’ebé dezigna husi Ministériu Saúde ka iha hela fatin rasik.
Jornalista : Juvita dos Santos
Editora : Nelya Barros
