Lautém—(Lafaek News)—Ministériu Solidariedade Sosial no Inkluzaun (MSSI) liu husi Sentru Solidariedade Sosial munisípiu Lautém halo ona pagamentu subísidu $.200 ba reklamante hamutuk uma kain 810.
Diretór Sentru Solidaridade Sosial Munisípiu Lautém, Paulo da Costa Pinto, informa familia uma kain hirak ne’e kompostu husi Postu administrativu Iliomar uma ka’in 64, Lautém 218, Lospalos 446, Luru 64 no postu administrativu Tutuala 18, simu ona subsídiu iha loron 8 Janeiru 2021.
“Tuir planu pagamentu sei halo loron rua ka bele mós loron haat iha munisípiu ne’e, loron primeriu halo pagamentu iha postu administrativu Lospalos no sei kontinua halo pagamentu ba postu seluk, reklamante 810 ne’e ho osan ne’ebé mak halo pagamentu ba sira hamutuk dólar $.162.000,” katak Paulo Costa Pinto ba jornalista sira hafoin partisipa iha pagamentu subsídiu $.200 ne’e ba benefisiáriu sira iha munisípiu Lautém.
Sorin seluk xefe suku Bauro Sidalio Fretas, hatutan iha nia suku Bauro reklamante ba subsídiu $.200 hamutuk 16, ne’ebé mak hetan ona sira nia direitu iha sestafoin lalais ne’e no prosesu pagamentu iha suku ne’e la’o ho di’ak.
Observasaun lafaek news iha ternu sita benefisiáriu sira kumpre distansiamentu social hanesan tuur dook malu metro ida no taka maskara metin ibun hafoin simu subsídiu $.200 iha tékniku sira ne’ebé halo pagamentu.
Jornalista : Elidio Castro
Editora : Nelya Barros
