Lafaek News—Emprezáriu Timor oan, Raul Lemos ho parseiru husi Indonézia ho Korea hakarak halo investimentu setór mina-rai hodi kontribui ba dezenvolvimentu Timor Leste.
“Ohin Ha’u mai ho parseiru sira husi Korea, Indonézia ami mai husu Prezidente Repúblika José Ramos-Horta nia apoia, ami ho kolega sira ne’e atu halo investimentu liu-liu ba iha mina-rai, ami ko’alia kona-ba rifenária tanba iha Timor Leste ita seidauk iha rifenária,” deklara Raul Lemos ba Jornalista hafoin ho ekipa hasoru malu ho Xefe Estadu, iha Palasiu Prezidensiál Bairru-Pité, kuarta ( 15/02/2023).
Tuir Emprezáriu Timor oan ne’e katak, Timor Leste iha poténsia rai maran iha tasi laran mós, barak tebe-tebes balun agora komesa esplora da-daun ona, tan ne’e hanoin atu halo investimentu iha rifenaria la’ós boot, maibé komesa ho mini rifenária hodi haree ba oin, nia poténsia ba oin mina nian ne’e halo nusa.
“Tanba agora da-daun ita seidauk iha grupu ida mak halo ida ne’e, se ami komesa ami atu importa grupu ida husi nasaun li’ur ne’e mai iha ne’e,” katak Rau Lemos.
Emprezária Timor oan Raul Lemos ne’e hatete, emprezáriu ne’e ho grupu hasoru malu ona ho ANPM, Ministru Rekursu Mina-rais, Timor Gap, sei aprosima bele servisu hamutuk ho Timor Gap, husu ANPM kona-ba regulamentu, ekipa halo ona survei ba rai iha Metinaro, Likisá.
“Prosesu ne’e tenke la’o maibé ba investimentu hanesan ne’e iha prosedur barak mak ita tenki priense,” nia dehan.
Parseiru sira ne’e husi Korea, no Indonézia sira iha esperensia kona-ba rifenária nune’e hakarak loke kampu servisu iha Timor hodi kontribui mós dezenvolvimentu ba Timor Leste.
“Mina refenária atu komesa husi 3 mil to’o 4 mill kada loron, tanba ita haree ba ita nia merkadu, merkadu Timor ne’e ki’ik ona grupu mós seida’uk iha ami komesa husi 4 mil ne’e por volta de 50 no 60 milloes dolares,” Raul argumenta.
Entretantu tuir emprezáriu Timor oan Raul, Lei investimentu ne’e uluk emprezáriu Timor sempre prokupa lei investimentu iha Timor ne’e, husu governu atu apoia liu-liu iha lei investimentu ne’e tenki tau klaru loloos ne’e tenki tau benefísiu ba iha Timor oan sira ida ne’e mak importante.
“Prezidente CCI TL agora, uluk nia sempre ko’alia kona-ba lei investimentu ne’e, espera iha nia mandatu ne’e nia bele haree hamutuk ho governu atu bele hadia ka bele kria lei investimentu di’ak ida hodi bele fó benefísiu ba emprezáriu Timor oan sira, ida ne’e mak ami hotu-hotu nia hakarak,”
Enkuantu, hafoin rona hanoin husi emprezáriu Timor oan no parseiru husi Indonézia no Korea ne’e xefe estadu Timor Leste José Ramos-Horta apoiu tebe-tebes kona-ba investor se de’it mak atu mai husi ne’ebe de’it ho intensaun atu investe iha Timor, kria kampu servisu ba Timor oan sira, ida ne’e PR simu ho laran haksolok no kontenti tebetebes no dehan katak Timor ne’e nakloke ba ema hotu-hotu ne’ebé mak atu mai priense ho didi’ak.
Jornalista : Rita Moniz
Editór : Agapito de Deus
