LafaekNews-Eskola Téknika Informátika (ETI) DILI re-ativa hikas aula prezensial, maibé estudantes ho porsentu 17 seidauk partisipa aula prezensial ho máximu, tanba transporte públiku seidauk halo movimentu husi munsípiu mai Dili hodi Partisipa aula prezensial.
Tuir Diretor Eskola Téknika Informátika (ETI), Dionísio Ximenes, informa, Ministériu Edukasaun liu husi edukasaun munisipal fó sai informasaun katak, eskola ne’ebé mak prienxe ona rekizitu sira husi ministériu edukasaun bele re-ativa ona aula prezensial.
“ETI re-ativa ona eskola, hahú aula prenzensial iha loron 19/07/2021 tanba prienxe ona rekezitu husi ministériu edukasaun nian ne’ebé fo sai ba eskola sira, no ami mós nafatin tuir protokolu ministériu Saúde no Organizasaun Mundiál Saúde(OMS) nian, maibé agora estudante kuaze pursentu 17 mak seidauk partisipa iha aula prezensial ne’e,” dehan Diretor ETI Dionisio Ximenes, ba LafaekNews iha nia knaar fatin Fomentu II, Dili, 28/07/2021.
Diretor Ne’e, relata, husi eskola refere rekizitus iha 2021 profesores sira tenke simu hotu vasina, entaun profesores sira iha ETI hamutuk 98% simu ona vasina falta porsentu 2 seidauk, tanba kondisaun grávida no balu tensaun aas.
Nia esplika, antes ne’e estudante ETI hotu partisipa liuhusi de’it aula online, maibé hasoru dezafiu barak tanba estudante sira hasoru hanesan rede sosiál la la’o.
“Ami haree tuir dadus ne’ebé iha, estudante hotu-hotu tuir aula online, maibé balun la akompaña ne’e tanba aula online hahú dala ruma rede sosiál la’o la diak nomos sira la iha pulsa atu tuir aula online,”tenik diretór
Nune’e nia sujere, hato’o ninia mensajen ba estudante sira ne’ebé sei iha hela ida-idak nia munisípiu atu hakat ona mai Dili nune’e bele tuir aula prezensial maske transporte públiku la halo movimentu, maibé tenke buka meius oinsá bele mai dili tanba ETI re-ativa ona aula prezensial durante semana ida resin ona.
Jornalista :Orlando Magno.
Asisten Editór : Egidio Nono
