Lafaek News—Professor iha Munisípiu Dili, kompostu husi ensinu pre-eskolar to’o ensinu sekundária Jerál (ESG) inklui Ensinu Tékniku Vokasional (ESTV) hamutuk 1,249 to’o agora seidauk simu vasina.
Tuir Diretór Edukasaun Munisípiu Dili Duarte Braganza informa, total professor iha kapital Dili hamutuk 3,153 kompostu husi ensinu pre-eskolar to’o ensinu sekundária jerál inklui tekniku vokasional, husi númeru ne’e professor hamutuk 1,904 (60,38%) mak simu ona vasina no 1,249 (39,62%) mak seidauk simu vasina.
“Desde ita nia preparasaun ba reativa eskola iha Dili ne’e iha loron 19 fulan jullu tinan 2021, tanba ita hare’e ona 50% professor mak simu ona vasina, ho ida ne’e to’o agora ita nia professor hamutuk 1,249 mak seidauk simu vasina no 1,904 mak simu ona,” dehan Diretór Edukasaun Munisípiu Dili Duarte Braganza ba jornalista sira iha nia kna’ar fatin, Komoro, segunda (02/08/2021).
Nia esplika, bazeia ba ejizensia husi Ministériu Saúde nian katak Ministériu Edukasaun Juventude no Desportu (MEJD) apela ba professor no estudante sira tenke simu vasina, tanba ne’e agora dadaun sira apela ba professor sira ne’ebé mak seidauk simu vasina ne’e labele fó hanorin ba estudante sira.
“Professor sira ne’e tenke submete ba governu tanba la kumpre ona regras Ministériu Saúde nian, atu nune’e wainhira la simu vasina sei la hanorin estudante sira, no sei tau falta,” tenik nia.
Enkuantu iha parte seluk, Diretor ESG 5 de Maiu Manuel Verdial dehan, Eskola atu realiza ona prossesu aprendijazem, maibé to’o agora seidauk simu dadus husi estudante sira ne’ebé mak simu ona vasina, tan ne’e husu ba MS atu fó vasina ba estudante, atu nune’e labele fó impaktu ba sira nia prossesu aprendijazem.
“Ami nia professor hamutuk 30 mak simu ona vasina no hela 18 inklui dadus ba estudante sira ne’ebé mak vasina to’o agora seidauk hetan, tanba ne’e ami husu ba ita nia MS hodi bele hola medida atu nune’e bele halo vasina iha ami nia estudante sira iha eskola refere, antes ita nia prossesu aprendijazem la’o hodi labele fó impaktu ba ita nia professor no estudante sira,” dehan.
Nia relata, total estudante iha ESG 5 de maiu ba tinan ida ne’e hamutuk 1,136 husi númeru ida ne’e to’o agora estudante barak mak seidauk simu vasina, tanba ne’e husu ba MS atu nune’e bele fasilita vasina ba estudante sira.
Enkuantu, total professor iha ESG 5 de maiu hamutuk 48 husi númeru ne’e professor hamutuk 18 mak to’o agora seidauk simu vasina inklui estudante hamutuk 1,136.
Jornalista : Etelvina Sarmento
Asisten Editór : Pedro de Almeida
