Lafaek News-Ho prinsípiu joven na’in 2 ne’ebé maka mai husi munisípiu lahanesan Tersa (10 /10/2023), iha ne’ebé joven mane na’in rua ne’e ida mai husi munisípiu Baucau ho naran Joni Martins no ida seluk naran Elvino Viegas Freitas mai husi munisípiu Ermera, maske mai husi munisípiu ketak-ketak maibé ho prinsípiu ida de’it katak nu’udar foinsa’e labele tane liman bei-beik ona ba inan-aman liuhusi fila liman hodi hetan osan.
Tuir negosiante Elvino Viegas Freitas ba Lafaek News hatete katak, Buka rasik osan labele sadere ba inan-aman tanbá inan-aman mak halo nasaun Timor-leste hetan liberdade tan ne’e agora joven tenke kria estabilidade hodi desenvolve nasaun ne’e ba futuru di’akliu tan.
“Durante katuas sira mos iha tempu luta nia laran sira halo buat barak ona ba ita nia rai doben Timor-Leste ho razaun ida ne’e ita halo sira kontente maibé labele halo tan sira estres, entaun ba oin ne’e koko mak oinsá atu nune’e hadi’a moris ne’e, ezemplu ki’ik hanesan tasi ne’ebé mak luan ema sei hakat liu satan ita ida iha Timor tansá ita labele esforsu, ita kaer ita nia modal hanesan iha $100,00 resin ita koko ona ba moris liuhusi fa’an sasan nune’e labele hanoin ba buat seluk maibé foku liu mak ba ida ne’e, ami hahú fa’an ne’e iha tinan 2018, ami fa’an ne’e la’ós iha Díli laran de’it maibé ba mos munisípiu hotu hela de’it Oecusse no Atauro mak ami seidauk fa’an to’o iha ne’ebá,” Elvino dehan.
Nia haktuir tan katak, ho modal ne’e rasik hahú husi $50,00 dolares de’it, ho ida ne’e kada loron ida $10,00 koko hatama ba kofre ki’ik ida durante fulan ida nia laran bele hetan $310,00 dolares.
“Ami rua fa’an hamutuk sasan no ami toman malu hanesan maun ho alin tanbá ami fa’an sasan hotu, entaun liuhusi amizade fa’an sasan ne’e mak ami hetan malu no toman malu mos, ami sente kontente tebes tanbá bainhira ami esforsu rasik ba ami nia aan rasik ho razaun ida katak lakohi sadere beibeik ami nia inan-aman, bainhira ita hola ona parte iha idade 17 ba leten presiza hamri’ik mesak, kompara ho ema nasaun seluk bainhira hola parte ona iha idade 17 ba leten ne’e inan-aman husik ona la hare’e ho inisiativa ida ne’e mak ha’u mos hakarak buka rasik hau nian para uza rasik ha’u nia osan iha moris loro-loron nian,” katak Elvino.
Entretantu, Osan ne’ebé duran sira na’in rua hetan ne’e uza ba presiza loron-loron nian no balun ajuda fila-fali família inan-aman nomós uza ba selu kost no hola aihan ba han.
Jornalista : Arnaldo Nunes
Editor : Paulo Collo
