Lafaek News (Nova Iorke)-24 Setembru 2022.Prezidente Repúblika Ramos-Horta promete hakarak reforsa kooperasaun ho nasaun sira iha Europa.
Hafoin hasoru ho Subsekretáriu Estadu Finlándia Kai Saur, iha Nova Iorke, Xefe Estadu hare possibilidade atu vizita ba Finlandia iha tinan 2023, hodi reforsa kooperasaun.
“Ha’u kuiñese nia (Kai Saur) di’ak, ha’u-nia amigu, kolega tinan lubuk ida laran, ami na’in-rua sempre kontaktu malu kada semana, Nia uluk Embaixadór ba Indonézia no mós ba Timor-Leste, Finlandia rai ida ho prestíjiu rai ki’ik mais membru NATO, fronteira ho Rússia, entaun sira preokupadu loos situasaun Ukránia, mais la haluha Timor-Leste, ami ko’alia possibilidade tinan foun ne’e mai 2023, ha’u sei ba vizita Finlandia, tanba ha’u hakarak ba Finlandia, Norwegia, ba Inglaterra, Alemaña tinan foun ne’e mai” hateten Xefe Estadu.
Tuir Xefe Estadu, relasaun externa entre Timor-Leste no nasaun balun iha Europa hakiduk iha tinan ikus ne’e.
“Tanba tinan sira-nia laran, ita-nia relasaun ho rai barak kuaze monu tun ba zero. Uluk relasaun makas ho Norwegia agora zero, uluk relasaun di’ak ho Finlandia agora zero ho Alemaña mós bele hatete zero, ne’eduni ho rai sira-ne’e ha’u halo kontaktu ona prontu atu 2023 vizita” hateten Xefe Estadu.
Relasiona ho relasaun bilateral ho Alemaña, Prezidente Repúblika hakarak explora oportunidade empregu ba joven sira no prosesu ne’e hahu ho vizita delegasaun Parlamentu Alemaña iha loron 24 fulan Outubro.
“Ho sira (Alemaña) ha’u hahú ona, koko haree oinsá Timoroan bele ba servisu iha Alemaña, mais liu husi prosesu ofisiál governu ho governu, ha’u lakoi ema privadu mete iha laran, deputadu ne’e Federal boot iha Alemaña, nia mak Prezidente Komisaun Bundestag Parlamentu Alemaña nian, mai ko’alia ho ha’u par haree relasaun bilateral no haree mós programa traballadór Timorense atu bá Alemaña. Ne’e ha’u sei ensiste tenki liu husi governu husi SEFOPE ho governu Alemaña, ha’u buka de’it halo diplomasia loke odaman” konklui Xefe Estadu.
Timor-Leste hanesan nasaun foun, ne’ebé aposta maka’as ba kooperasaun externa ho nasaun hotu, hodi haforsa dezenvolvimentu iha seitór vital hotu.
Jornalista : Rita Moniz
Editor : Agapito de Deus
