Lafaek News—Prezidente Konsellu Imprensa (KI), Virgilio da Silva Guterres, ohin tersa (09/11) halo vizita kortezia ho Primeiru Ministru Taur Matan Ruak hodi koalia kona-ba aujénsia lei sibernétika no husu kria kuadru legal hodi regula krime sibernétika.
Prezidente Konsellu Imprensa (KI), Virgilio da Silva Guterres hateten, dadaun ne’e iha Parlamentu Nasionál, Konsellu Imprensa mós hato’o nia paraser, neduni mai atu enkoraja tan sua eselénsia Primeiru Ministru no Ministériu sira ne’ebé relevante atu kontinua avansa ba oin.
“Iha tempu badak bele iha kuadru legál ruma hodi regula krime sibernetika ninian. Ami mós hato’o tan, posibilidade ita bele estabelese sistema monitórizasaun ba iha hoax ka desinformasaun sira,” dehan Prezidente KI hafoin hasoru malu ho Primeiru Ministru Taur Matan Ruak, iha rezidénsia PM Faról Dili, tersa (09/11/21).
Presidente akresenta, Konsellu imprensa mós halo identifikasaun katak presiza iha enfraestrutura no liu-liu atu bele asesu ba software sira ne’ebé bele fó apoia.
“Software sira ne’ebé bele fó apoia ita, katak ita tenke selu tina-tinan, mas ne’e ami informa atu nune’e bele fasilita liu tan Konsellu Imprensa ninia servisu liu-liu iha área monitorizasaun,” nia imforma.
Enkuantu atividades ne’ebé Konsellu Imprensa halo iha situasaun pandemia ne’e mak hanesan komemorasaun Balibo Five hodi lansa kampaña Balibo sidade de liberdade, atividade seluk mak sensibilizasaun ba públiku kona-ba lei no regulamentu ne’ebé konsellu imprensa fó sai no atividade seluk mak kóperasaun ne’ebé konsellu imprensa halo ho embaixada Amérika atu fó formasaun ka Worshop ba estudante no joven sira kona-ba fact chek iha universidade lima, tolu iha munisipiu Baukau, Manufahi, Ermera no rua iha Dili, nune’e informasaun sira ne’ebé joven sira hetan atu labele fahe arbiru ne’ebé laiha verasidade ka laloos.
Jornalista : Juvita dos Santos
Asisten Editór : Pedro de Almeida
