Lafaek News–Prezidente Repúblika, Francisco Guterres Lú Olo, liuhusi dekretu Prezidente Repúblika nomea membru VIII Governu Konstitusionál na’in-4, Prezidente Repúblika uza kompeténsia konstitusionál tuir artigu 106 númeru 2 halo nomeasaun ba membru Governu bazeia ba proposta husi Primeiru Ministru.
Prezidente Repúblika Fransisco Guterres Lú Olo deklara asuntu ne’e liu husi komunikadu imprensa media Palásiu Prezidensiál ne’ebé mak jornalista asesu iha segunda 21/03/2022 katak serimonia tomada de pose sei realiza iha loron tersa (22/03/2022) iha salaun prezidensial Bairu-pite.
Membru governu na’in-4 ne’ebé hetan nomeasaun husi Prezidente Repúblika mak hanesan tuirmai ne’e, Ministru Obras Públikas, Abel Pires da Silva, Ministru Justisa, Tiago Amaral Sarmento, Vise-Ministru Finansas, António Freitas, Sekretáriu estadu ba Assuntus Kombatentes Libertasaun Nasionál, Júlio da Conceição ‘Loro Messak”, deklara Lú Olo liu husi komunikadu imprensa media Palásiu Prezidensiál segunda 21/03/2022.
Tuir PR Lú Olo, Presidente Repúblika uza kompeténsia konstitusionál tuir artigu 106 númeru 2 halo nomeasaun ba membru Governu bazeia ba proposta husi Primeiru Ministru, Tuir artigu 86 alinea h) Konstituisaun Repúblika Demokrátika Timor-Leste hateten katak Prezidente Repúblika mak iha kompeténsia atu nomea, fó posse no ezonera membru Governu, tuir proposta husi Primeiru Ministru.
PR, Franciso Guterres Lú Olo, sei fó posse ba membru Governu na’in-4 iha tersa feira, 22 marsu 2022, tuku 09.30, iha Palásiu Prezidensiál Nicolau Lobato”.
Entretantu, Molok halo nomeasaun ba membru governu na’in-haat, tuir proposta husi Primeiru Ministru, Prezidente Repúblika liuhusi Dekretu Prezidente Repúblika ezonera, Ministru Obras Púbilkas, Salvador Eugénio Soares dos Reis Pires, Ministru Justisa, Manuel Cárceres da Costa, Vise-Ministra Finansas, Sara Lobo Brites, Sekretáriu Estadu ba assuntus kombatentes Libertasaun nasionál, Gil da Costa Monteiro ‘Oan Soru’.
Jornalista : Rita Moniz
Editor : Agapito de Deus
