Lafaek News–Udan tau kuaze oras ida resin, bee husi kadalak sulin hamutuk ba mota Kunsin mota Komoro Ulun, populasaun kiik sira ne’ebé buka moris ho pasiénsia dudu transporte husi mota laran hodi hakur liur korente mota siak pasiénsia tulun malu hodi hakat liu.
Udan iha loron kuarta (05/01/2022), iha tuku tolu lorokraik OTL, rezulta volume bee boot ne’ebé sulin husi kalen populasaun sira nian naksulik hamutuk ba kadalak laran nadodon ba mota Kunsin Komoro ulun hodi hasusar tebes komunidade kiik sira ne’ebé husi munisípiu Aileu, Ainaro, Manufahi no Kovalima hodi buka moris ba mai iha Dili.
Populasaun kiik tulun malu bainhira hasoru malu iha mota Kunsin, balun hein hodi ajuda dudu hela maluk seluk ne’ebé uza motorizadas ba rai maran, maske korente bee tebe ho forsa, sira konsolida forsa hamutuk hodi ajuda maluk seluk ne’ebé presiza hakat liu.
Kondutor sira hanesan konduz truck vaskolante ho bis tula pasajeiru hodi obriga aselera kareta tama mota laran la tauk maske presaun bee siak, tanba laiha dalan alternativu no laiha ponte atu fasilita halai husi leten ba estrada sorin.
Bainhira jornalista Lafaek news tenta husu pasajeiru sira, laiha komentariu naruk, maibé sujere governu ida ne’e atu halo netik ponte kiik ida hodi fasilita populasaun munisípiu Aileu, Ainaru, Manufahi ho Kovalima atu halo viajen ba mai ho seguru.
Jornalista : Orlando Magno
Editor : Agapito de Deus
