Lafaek News—Reprezentante povu iha uma fukun Parlamentu Nasionál (PN), bankada PLP, Abel Pires, husu Ministériu Negósiu Estranjeiru Kooperasaun (MNEK) ho Ministeriu Saúde (MS) atu tau matan no vasina estudante Timor-oan na’in 25 iha Konsuladu Timor Leste iha Atambua.
“Ha’u hakarak bolu atensaun, kondisaun Konsulado iha Atambua, estudante barak maka agora hein hela iha ne’eba no na’in 25 hela iha konsuladu, entaun staff sira iha ne’eba tenke sai ba merkadu ba loja atu bele atende sira,” Deputadu Abel Pires levanta kestaun ne’e liu husi nia deklarasaun iha PN, tersa, (12/01).
Bankada husi partidu PLP ne’e dehan bainhira sitausaun Covid-19 kontinua sae makas iha Atambua fo risku teb-tebes no impaktu negativu ba staff no estudante sira, maske fronteira taka, maibé buka dalan atu rezolve.
“Ha’u konkorda katak fronteira taka tiha ona, maibé situasaun hanesan ne’e oinsá buka dalan resolve ida ne’e, tanba sira iha ne’eba susar tebes, staff sira menus kondisaun mós ladun di’ak, sira labele dehan lae ba estudante tanba sira Timor-oan sira atu halai ba ne’ebé, tan ne’e husu MNEK no MS atu haree, kona-ba ita nia vasina, tanba ho vasina maka ita bele manan,” nia fundamenta.
Entertantu hatan ba preokupasaun ne’e, Minístra Negósiu Estranjeiru Kooperasaun (MNEK), Adaljiza Mango, hatete, sidadaun Timor-oan ne’ebé maka rejistu iha Atambua hamutuk na’in 36 ne’ebé hela iha konsuladu atu mai, maibé sira la mai tanba konsekuénsia ita lockdown.
“Ita hotu hakarak sira fila, mas ita kumpri desijaun ne’ebé ita halo ona, no ita konkorda katak ita taka lai, purtantu baseia ba dekretu lei fo kompeténsia ba Ministéiru Interior (MI) para halo despaisu ida taka lai Fronteira, no ita taka hela ate 14 dias,” hateten nia.
Nia hatutan atu rezolve asuntu ne’e sei halo koordenasaun ho liña ministeriais, Ministériu Interior, Ministériu Saúde, atu hare’e bainhira maka bele rezolve sira nia kondisoens, preokupasaun se sira hela kleur iha ne’eba ladun di’ak.
“Ami hanoin para atu rezolve no lori fila sira bainhira, mas ida ne’e ami sei kordena MS para hare’e kapasidade kuarentena ne’ebé agora dadauk iha Dili, purtantu ita nia ajente konsuladu iha atmbua tau matan hela ba sira,” nia informa.
Jornalista : Pedro de Almeida
Editora : Nelya Barros
