Lafaek News–Primeiru Ministru Taur Matan Ruak, sesta (04/02/2022), ofisialmente lansa Estratéjia Nasionál Protesaun Sosial 2021-2030, hodi asegura kobertura substansial inklui kontribui hodi Hamenus ki’ak no vulneralidade ba sidadaun hotu iha Timor-Leste.
Ministra Solidariedade Sosiál no Inkluzaun (MSSI), Armanda Berta hateten, estratejia nasional ida ne’e nu’udar instrumentu ida ne’ebé trasa no loke dalan ba protesaun sosiál iha dekada tuir mai.
Estratéjia nasional ida ne’e aprova iha Konsellu Ministru iha loron 11 fulan novembru tinan 2021 liubá,”dehan MSSI Armanda Berta iha Salaun City8 Haas Laran Dili, sesta (04/02/2022).
Nia sublina, estratéjia nasional ba protesaun sosiál iha 2021 to’o 2030 nu’udar dokumentus estratéjikus atu kontinua hatutan dezenvolvimentu protesaun sosiál asegura direitu no garante fundamentu sidadaun hotu nian.
Ohin eventu ida ne’e ita pretende halo lansamentu ofisial estratéjia nasional ba protesaun sosiál ba tinan 2021 to’o 2030 husi sua eselensia Primeiru Ministru hodi fó sai cidaun no objetivu estratéjiku iha area intervensaun i mós atividades ne’ebé mak sai prioridade husi governu Timor-Leste,”informa Armanda Berta.
Iha fatin hanesan, vise embaixadór Austrália Suzy Wilson hateten, Austrália sei suporta implementasaun ba estratéjia ne’e, partikularmente iha area dezeñu no asisténsia finansas ba programa bolsa da Mãe jerasaun foun bainhira programa ne’e sai nasionál.
Ami fiar programa ne’e iha impaktu boot tebes ba futuru, apoiu feto isin rua no labarik hasoru dezafiu ekonomia iha Timor Leste laran hotu,”dehan Vise Embaixadór Australia Suzy Wilson.
Enkuantu Australia fó asisténsia direitu ba orsamentu hanesan dolares amerikanu 15 hamutuk ho programa PNDS. Programa ne’e sei apoiu ba munisipiu hotu-hotu iha Timor-Leste.
Jornalista : Juvita dos Santos
Editor : Agapito de Deus
