Lafaek News—Partidu Libertasaun Popular (PLP) hakarak eleisaun parlamentár 2023 ne’e tenke la’o ho kualidade, fo liberdade no esperansa ba povu atu vota konsiénsia ho liberdade tomak tuir direitu fundamental.
Portavoz PLP, Deometrio Amaral deklara asuntu ne’e ba jornalista sira hafoin remata enkontru ho Prezidente Repúblika José Ramos-Horta, Sesta (03/02/2023), iha palasiu prezidénsial Nicolao Lobato Bairopité Dili Timor Leste.
“Husi PLP ami nia opiniaun, eleisaun jerál ida ne’e ne’ebé mosu depois iha tinan 20 de Restaurasaun Independénsia, nune’e ita hakarak atu eleisaun ida ne’ebé la’o ho kualidade, ne’ebé rekere ita nia preparasaun sira ho di’ak, ema termos lojistik, em termos kuadru legál sira ne’ebé sei gia operasionalizasaun, prosesu eleisaun sira no mós rekursu humanu ne’ebé bele operasionaliza sistema sira ne’ebé ita divoi ba fó andamentu ba eleisaun jerál ita sei hala’o,” dehan II Vise Prezidente PLP Deometrio Amaral.
Deometrio Amaral relata sobre enkontru ne’e, Xefe Estadu konvida hanesan konsultasaun ida ho Partidu Polítiku sira, PLP na’in 5 reprezenta partidu hodi fó opiniaun iha konsultasaun ne’ebé mak Prezidente inísia, matéria prinsipál ne’e kona-ba Prezidente nia desizaun ba deklara iha eleisaun jerál.
“Husi PLP haree iha biban ida ne’ebé Prezidente Repúblika ida ne’ebé mós koñesidu iha mundu hanesan Loriadu Nobel da Páz, tanba ne’e, eleisaun jerál ida ne’ebé akontese depois iha tinan 20 ne’e, tenke eleisaun jerál ida ne’ebé hala’o iha biban ida ne’ebé ho akuantibilidade no mós demostra lideransa sira hotu nia prosesu jestaun iha prosesu eleisaun ne’e rasik,” nia argumenta.
Tuir II Vise Prezidente partidu polítiku ne’e katak, atu garantia iha Eleisaun Parlamentár 2023 ne’e no iha eleisaun ne’e mós kadeira aumenta ka lae, hanesan partidu polítiku, kuadru legál ne’ebé sira (membru PLP) tuir maka kona-ba lei partidu polítiku nian prepara an hanesan partidu polítiku.
“Kona-ba atu halo koligasaun ne’e, ami sei iha kongresu mak sei deside, kongresu ne’e iha tempu badak,” II Vise Prezidente PLP ne’e hakotu.
Jornalista : Rita Moniz
Editór : Agapito de Deus
