Lafaek News—Partidu Demokrátiku (PD) garantia prontu hasoru eleisaun parlamentár 2023, no prontu hodi hein desizaun Prezidente Repúblika dekreta loron eleisaun.
Kestaun ne’e hato’o husi sekretáriu Jerál partidu Demokrátiku (PD) António da Conceição “Kalohan” ho estrutura bainhira remata enkontru ho Prezidente Repúblika José Ramos-Horta..
“Ami mai nafatin fó garantia ba Prezidente Repúblika dehan katak ami prontu nafatin hodi hasoru eleisaun parlamentár 2023 nian, hanesan mos iha tinan 2018 liu bá, partidu Demokrátiku prontu nafatin, desizaun iha Prezidente Repúblika nian liman atu aban ka bainrua ka partidu Demokrátiku hamrik nafatin saida mak Prezidente Repúblika desidi”, deklara sekretáriu Jerál partidu Demokrátiku António da Conceição “Kalohan” Ba jornalista sira iha Palasíu Prezidensiál Bairu pite Kinta semana ne’e.
Kalohan hateten, kona-ba dekreta ELPAR 2023, Prezidente Repúblika mak sei deside, partidu Demokrátiku mai hanesan partidu ne’ébe mak moris tinan 22.
“PD nian preparasaun 88% lao iha aldeia hotu-hotu, estrutura ne’ebé mak partidu Demokrátiku ninian, uluk iha eleisaun tinan kotuk liu bá ami ko’alia 66, agora amo ko’alia 88, 88 ne’e estrutura ne’ebé mak ami monta iha kada aldeia ne’ebé mak la’o, ami iha ona baze dedadus ne’ebé mak ami iha to’o horibainrua kuandu ami halo preparasaun iha ona 29 mil ne’ebé mak tama iha estrutura, maibé ida ne’e rejistu ne’ebé mak PD iha, PD konsege atualiza ona, PD nafatin lao iha baze, iha aldeia hotu,” katak SEKJER PD ne’e.
Hodi dehan espetativa PD mak ida ne’e preparadu ba eleisaun I nafatin ho pozisaun ida ne’ebé mak partidu Demokrátiku iha katak Maubere oan prontu serbí, halo koligasaun antes ka depois eleisaun.
Sekretáriu Jerál PD ne’e hateten, Ida ne’e la’ós kestaun ida ne’ebé mak PD bele ko’alia agora, tanba partidu hotu-hotu sei mai hasoru Prezidente Repúblika, depois mós partidu ida-idak sei prepara nia votus, PD halo tiha ona ninian konferénsia nasionál ne’ebé lejítima ona mós rezultadu kongresu anterior ninian, agora la presiza tan halo kongresu prosesu rekejitu ne’ebé mak lei ezije PD halo ona, más PD hatene partidu balun seida’uk halo sira nia kongresu tanba ida ne’e mak PD seida’uk iha oportunu hodi ko’alia kona-ba koligasaun.
“Kadeira aumenta ida ne’e mak espetativa PD nian, tenke ho perspetiva aumenta ninian”, hakotu Sekjer partidu PD António Kalohan.
Jornalista : Rita Moniz
Editór : Agapito de Deus
