Lafaek News—Postu saúde suku Leohitu, postu administrativu Balibo, munisípiu Bobonaru, laiha pesoal saúde atu fo atendimentu rutin aba pasiente sira ne’ebé presiza tratamentu urjénsia.
Maria Valentina Collo, hanesan pesoal saúde iha postu saúde refere, hateten maske postu saúde Leohitu krize rekursu, maibé nia parte nafatin esforsu fo atendimentu ba pasiente sira ho di’ak.
“Posto saúde Leohitu ne’e ha’u mesak mak halo atendimentu ba pasiente sira kada loron ha’u bele atende moras kuaze 30, maibé haree ba moras, se barak entaun bele to 40 resin liu no pasiente sira mai ho moras ne’ebé la hanesan no Inan sira ne’ebé gravida karik la ho kondisaun komplikadu hau bele fo partus iha ne’e deit se la bele entaun hau tenke halo pediso hodi transfere ba RHS municipio ne’ebé konaba atendimenti la’o di’ak tebes ,” Maria Valentina Collo ba Lafaek News iha Postu Saúde Leohitu, (16/10/2024),
Infermeira haktuir, kona-ba atendimentu ne’ebé nia halo kada loron simu pasiente kuaze nain 40 resin ne’ebé mai ho moras ne’ebé la hanesan, no ba pasiente ne’ebé ho moras komplikadu nia parte propoin atu transfere ba diresaun saúde munisípiu Bobonaru hodi fo asisténsia.
Tui nia, medikamentu ne’ebé fornese ba pasiente sira kada loron mak hanesan Paracetamol, Amoxilin, cotrimoksasol, biglo, ibuprofen, zim, ORS no seluk tan.
Iha biban ne’e komunidade no pasiente sira ne’ebé hela iha area rural, kada fulan guverno liu husi Programa pakote integradu Saúde PIS sempre dezloka ba area rural hodi fo atendimentu ba komunidade sira.
Entretantu moras ne’ebé rezistu as liu iha posto saúde Leohitu ISPA no diareia inklui mal-nutrisaun ema nain neen 6 no total dadus ne’ebé rejistu iha postu saúde refere hamutuk ema Rihun tolu atus ida neen nulu resin neen ( 3,166.)
Jornalista : Aniceto Dias
Editor. : Agapito de Deus