Lafaek News—Operadór Telkomcel Lansa Myfood liu husi aplikasaun dijitál hodi suporta no hamoris negosiante mikro Ki’ik no médiu Timor-Leste, Iha tempo susar hasoru surtu Covid-19.
Haree ba situasaun surtu Covid-19 ne’ebé da-daun afeita hela mundo global to’o ohin loron, fo impaktu liu ba movimentasaun no iha atividade ne’ebé limitadu tebes, situasaun ne’e akontese mós iha nasaun boot sira seluk ne’ebé koñesidu ho lia-fuan lockdown.
“Relasiona ho surtu Covid-19, Governu Timor-Leste rekomenda ona desizaun Estadu Emerjénsia ne’ebé maka atividade ekonomia no negósiu sira tenki obrigatóriu hala’o servisu husi uma, tan ne’e movimentu ekonomia komunidade nian limitadu tebes ne’ebé fo impaktu boot iha setór negósiu sira, liu-liu negosiante mikro, ki’ik no mediu sira. responde ba situasaun hirak ne’e, Telkomcel hanesan kompañia telekomunikasaun iha Timor Leste, hanesan parte husi Telkom Group inisiativa hamosu produtu MyFood, aplikasaun hodi fasilita restorante mikro, ki’ik no médiu iha kapitál Dili hodi dezenvolve no promove transasaun liu husi maneira Dijitál dahuluk iha Timor-Leste,” afirma CEO Telkomcel, Yogi Rizkian Bahar sublina, iha komunikadu imprensa ne’ebé Lafaek News asesu iha segunda (21/06/2021).
Yogi Rizkian Bahar subliña, Telkomcel hanesan operadór telekomunikasaun subsidiáriu husi kompañia Telin, Telkom Group iha Timor-Leste, rekoñese katak Timor-Leste hanesan nasaun dezenvolvidu no nia jerasaun milineal ativu tebes iha utilizasaun teknolojia, tanba ne’e MyFood bele sai hanesan aplikasaun ne’ebé suporta movimentu ekonomia iha situasaun estadu emerjénsia.
MyFood hanesan parte foun ida husi aplikasaun MyTimor úniku atu ajuda negósiu UMKM (*sigla Indonezia, negósiu mikro, ki’ik no médiu), liu-liu hanesan negósiu restorante iha Timor-Leste iha tempo surto Covid-19.
“Antes ne’e ami lansa ona MyTimor hanesan aplikasaun motorizada no taxi online hodi fasilita no tula pasanzeiru no mos manda sasan sira ba dahuluk iha Timor-Leste,” katak CEO Telkomcel ne’e.
Aplikasaun Myfood ida ne’e hanesan inovasaun dijitál ne’ebé oferese husi kompañia Telkomcel hahú husi fulan Dezembru tinan 2020, ho servisu MyFood, signifika katak aplikasaun MyTimor la’os de’it bele manda sasán, maibé bele mós manda hahán to’o iha kliente nia uma oin.
Aplikasaun MyTimor rasik iha ona kreximentu ne’ebé rapidamente ba nia utilizasaun (user), dezde inísiu to’o ohin loron iha ona kreximentu (growth) porsentu 80 (80%), MyTimor mós servisu hamutuk ho ajente transporte lokál no oferese oportunidade ba komunidade sira ne’ebé hakarak servisu nu’udar motoristas (driver) ba motorizada no taxi ho nia kreximentu (growth) motoristas 17%.
MyTimor iha ona parte MyFood atu fasilita negósiu restorante sira iha kapital Dili hodi dezenvolve no hasa’e transasaun liu husi maneira dijitál, fasil ba kliente sira hodi hameno hahán husi ne’ebé de’it no banhira de’it, MyTimor mós kolabora ona ho ristorante 80 hirak ne’ebé hetan ona sertifikadu iha Timor-Leste liu-liu iha kapital Dili.
Prezensa MyFood hanesan mos responsavel sosiál husi kompañia Telkomcel ba komunidade Timor-Leste liu-liu ba negósiu iha nivel mikro, ki’ik no mediu sira, tanba dadus no peskija hatudu dezenvolvimentu ne’e mikro, ki’ik no médiu sira hanesan pilar ekonomia komunidade nian no sei ajuda mos hasa’e kreximentu ekonomia no rekoperasaun ekonomia nasionál.
Jornalista/Editór :Agapito de Deus
