Lafaek News—Konselleru máximu Partidu Kmanek Haburas Unidade Nasionál Timoroan ( KHUNTO) José dos Santos “Naimori Bucar” optimista katak partidu ne’e nia kadeira sei aumenta tan iha eleisaun parlamentar 2023 tinan ne’e bainhira povu fo fiar.
Konselleru Máximu Partidu KHUNTO hato’o asuntu ne’e hafoin ekipa partidu KHUNTO ne’ebé mak hetan assentu parlamentár hasoru malu ho Prezidente Repúblika José Ramos-Horta, Xefe Estadu rona partidu politíka nia hanoin hafoin Prezidente Repúblika José Ramos-Horta dekreta loron eleisaun parlamentár.
“Se povu fó fiar ha’u senti partidu KHUNTO nia kadeira ne’e bele sa’e as liu tan foin lalais ne’e, ida ne’e KHUNTO iha esperansa tebetebes katak KHUNTO sei sa’e, sa’e tanba saida, tanba KHUNTO prontu atu serbí hamutuk ho povu para bele oinsá fó hanoin no haforsa tan povu kbi’it laek oan sira, hodi bele moris iha situasaun livre, dame ho páz, kria estabilidade ita hotu-hotu hanoin sentidu Estadu ne’e ho di’ak”, deklara Konselleru Máximu Partidu KHUNTO, José dos Santos “Naimori Bucar” iha Palasiu Prezidensiál Bairu pite Kinta (02/02/2023).
Tuir Konselleru ne’e katak, kuandu kontribui ba estadu ida presiza hotu-hotu hamutuk, ne’e mak KHUNTO sempre halo ona, kona-ba oinsá Timoroan sempre hamutuk hanesan tema partidu KHUNTO nia katak haluha pasadu haree ba futuru, ne’e katak la’ós atu haluha istória, maibé haluha pasadu mak ida ne’ebé egoís no problema ki’ik.
“Ha’u senti partidu KHUNTO prontu ona hodi tuir eleisaun ne’e ho di’ak, ne’e mak ita hotu-hotu rona de’it husi Prezidente Repúblika bainhira mak atu promulga loron eleisaun nian, khunto prontu ona atu bele halo servisu, politíka ita hotu-hotu halo Politíka tanba ita hotu-hotu iha garantidu katak partidu ne’e atu manán ka la manán ita tenki hatudu ita nia forsa ida ne’ebé fó fiar husi povu, ne’e ita tenke hatudu momoos”.
Konseleiru partidu KHUNTO Naimori Bucar hateten, povu mak sei desidi, povu mak sei julga katak nia hakarak partidu ida ne’ebé loos, ne’ebé partidu ida-idak lao ninian depois to’o ne’eba mak ita haree oinsá ita bele lao hamutuk forma governu ne’e konforme partidu ida ne’ebé manan Maiória.
“Plataforma katak ne’e hodi asegura governu da-ualu, maibé ida ba eleisaun agora ida-idak lao ninian depois eleisaun hotu mak bele ko’alia, buat hotu ita fiar ba povu, tanba povu mak sei desidi, ha’u atu dehan de’it katak ita manán ka la manán povu mak sei desidi, se povu la vota ita, ita la halo buat ida ita bele ko’alia to’o iha ne’ebé mós povu hatene katak saida mak ita atu halo”, afirma Konselleru Naimori Bucar ba jornalista.
Jornalista : Rita Moniz
Editór : Agapito de Deus
