Lafaek News-Oitavu governu konstitusional liuhusi Konsellu Ministru kuarta (14/07) deside kontinua serka sanitaria iha munisípiu Dili ba loron 14, hahú husi loron 15 to’o 29 fulan jullu tinan 2021.
Ministru Prezidénsia Konsellu Ministru, Fidelis Leite Magalhães (MPKM) hateten, konsellu ministrus hala’o sorumutuk iha Palásiu Governu aprova ona, hafoin halo análiza ba aprezentasaun kona-ba pontu situasaun epidemiolójika nasionál nian husi Sala Situasaun Sentru Integradu Jestaun Krize (SIJK).
“Konsellu Ministrus delibera atu aprova projetu rezolusaun governu nian ne’ebé mantein impozisaun serka sanitária iha munisípiu Dili ba loron 14 tan, to’o oras 23:59 loron 29 fulan-jullu tinan 2021”, dehan MPKM Fidelis ba Jornalista hafoin remata enkontru Konsellu Ministru iha Palásiu Governu Dili, kuarta (14/07/21).
Governante ne’e akresenta, bandu nafatin sirkulasaun ema sira iha munisípiu Dili no sirkunskrisaun administrativa sira-seluk. Maibé iha kazu hirak ne’ebé ninia fundamentu forte tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian.
“Delibera mós katak oras ne’e sentru sira kontrolu integradu nian, atu tama no sai husi munisípiu Dili, sei funsiona durante oras 24 loron-loron” informa Nia.
Ikus liu Fidelis dehan, proibisaun sirkulasaun ne’e la abranje ba ema sira ne’ebé komprova ona vasinasaun kompleta (doze rua) kontra COVID-19 nian, nune’e mós ba labarik sira iha tinan neen mai-kraik ne’ebé akompaña inan-aman sira.
Jornalista : Juvita dos Santos
Editór : Agapito de Deus
